哩個係朋友嘅故事。 朋友A婚後一直同6299一齊住，當然有好多唔習慣嘅地方，但諗到「寄人籬下」就唯有隻眼開隻眼閉。而朋友A一直對兩老都恭恭敬敬，每月都按時發俾家用，始終兩老都照顧左起居飲食嘛。 無幾耐，朋友A姑奶有左要結婚，婚後帶埋姑丈住入哩間屋，即係話，6個大人加個未出世嘅bb，有3間房都免強住到。 問題黎啦，姑奶無咩錢，平時已經無咩俾家用，連結婚亦一直都係問屋企拎錢：影結婚相買戒指訂酒席等。不過中途唔知咩事同6299嘈（好似係6299唔想再做人肉ATM），姑奶嬲起上來自行取消酒席，可憐兩老嘅官材本就咁化為烏有。就因為咁，大家心裡頭都有條刺，直到bb出世後都好多牙齒印，問題不斷滾大。 然後朋友A都有左，兩老好開心，為左粒孫都對朋友A照顧周到。睇在朋友A眼裡，兩老的確有點偏心對佢好，而忽略左姑奶一家，所以朋友A開始感到有壓力。 直到朋友A嘅bb出世了，問題又黎啦！6299想將間大房同朋友A間細房對調，朋友A極度不願意，因佢深明姑奶一定俾說話聽（正常人都會啦，大細超到出哂面）。但多翻推辭都無用，6299好堅持要對調間房⋯⋯結果，大家應該估到了吧！ 好啦，以我菠蘿油皇后係外人身分分析，雖然姑奶係親女兒，不過佢由始至終都無做過女兒嘅責任同孝道，唔可以怪兩老偏心喎！而且姑奶有左之後，申請左公屋，咁即係有搬走嘅計劃啦，咁點解要嬲兩老偏心唔調房俾自己呢？既然都擺明等一收到屋就搬，何況當初大家攪到各人都有條刺，我覺得姑奶根本無資格去嬲人囉！ 唉，睇黎朋友A都有排受了。家家有本難念的經，作為朋友都只可以做一個聆聽者而已。 ~完~