大年初四繼續拜年行程，今年相約叔公叔婆到鰂魚涌寵物公園拜年，事因佢哋都有養狗狗，算係一個幾特別的節目!       瞓到自然醒係放假最幸福的事情，然後相約到附近茶樓入茶! 自從搬離開元朗都好少親眼睇Lion Dance表演! 估唔到食食吓嘢有得睇喎!    仲要喺正我哋枱面前跳同埋採青! 所以哥哥芊芊都開心到不得了   飲完茶我哋離開酒樓行過去鰂魚涌消防局只需5分鐘，沿海旁路行入去就係鰂魚涌寵物公園(大概只需5分鐘路程)   佢哋見到叔公的狗狗就已經嘈住話要拖住佢行! 芊芊又驚又想拖，所以只好拖住繩尾!     兩兄妹拖住狗狗照顧佢呢個情景好溫馨!   話咁快就嚟到竉物公園!   有兩個大閘防止狗狗衝出去馬路     沿住海旁繼續拖住狗狗散步，沿途見到其他狗狗，佢哋都好開心! 而且見到的狗狗好多係佢哋都第一次見   成個人咁大隻都有，連我自己見到都有D嘩嘩聲!     鰂魚涌寵物公園只係一條垂直的海濱長廊，由頭行到去尾就盡頭，只可以番轉頭行!     不過拖住狗狗嚟散步吹吹海風望望維港，真的幾舒服寫意!           芊芊又想抱但係又唔敢抱, 只好攪攪狗狗條尾巴   望狗狗嚟幾張大特寫!     哥哥從小就一路嚷着話要養狗，但係我同媽咪就當然唔俾啦，因為知道佢只係一時三刻衝動，我哋鼓勵他先養魚，如果有盡責自動自覺去照顧佢哋，再一步一步到時後我哋認為合格先可以養! 當然結果係...只有頭幾日喺金魚缸前，日子耐咗依家連餵魚都冇!       至於芊芊玩狗狗玩得耐都忍唔住要我陪佢踢波! 當然這個寵物公園係唔俾球類活動，不過我哋企埋一邊輕輕踢就冇咩問題     得閒我哋可以多D過嚟搵狗狗玩，順便探下叔公叔婆(係咪調轉咗講呀!)         Photo by CANON 5D Mark IV, Len | EF 24-70mm f2.8L II USM   想跟我去體驗其他活動，快D報名親子團，同埋留意專頁公佈詳情啦！ http://goo.gl/forms/CNZMEPoMIWkouK8o2   呀劍評分: 7分   呀劍評語: 簡單的海濱長廊，珍貴的係一班狗狗朋友可以有個聚腳處! 但係我覺得香港實在太少有這種地方! 依家養動物的人愈來愈多，政府真係要諗諗如何擴展更多地方俾佢哋!     鰂魚涌寵物公園 簡介 是香港的一條海濱長廊，位於香港島鰂魚涌海裕街，耗資1,950萬港元興建，於2012年12月28日啟用，由康樂及文化事務署管理。   地址 鰂魚涌海裕街 設施  寵物公園 配套設施 涼亭、座椅及狗糞收集箱  開放時間  每日24小時  查詢電話 2513 8499 (以上資料更新至文章當日)     Facebook專頁: 呀劍萬帥 kimfamilytravel     Blog網誌 : kimfamilytravel.blogspot.hk