而家啲小朋友真幸福！親子餐廳開完一間又一間。自焱咲自煮理平板燒概念店、大樹先生同埋Unique Cafe Kitchen之後，又一間新落成喇！位於新蒲崗Mikiki嘅PLAYHOUSE親子Cafe開業冇耐，一於去踩場玩番轉，睇下咩環境囉！ PLAYHOUSE全港有4間分店，每間都設有唔同主題。而Mikiki呢間嘅主題係海洋呀！ 去到門口已經見到好大艘船，我哋好快就會進入海洋世界喇！*o* 小朋友一個跟一個排好隊，先戴上手帶~ 然後除鞋放好，記得清潔雙手喎！ 嘩！好大個波波池呀！*o* 一大遍藍加白色嘅波波，就好似海上捲起白浪一樣，晴朗已經急不及待入去感受下喇！ 除咗波波池，仲有好大個攀爬區，呢條係由攀爬區延伸過嚟嘅橋道~ 經過橋道就可以去到呢個圓形塔玩喇！ 穿插於波波池，晴晴就化身成為一條快樂海豚一樣，無拘無束，想點玩就點玩啦！ 瞄準目標，發射！哎吔！差啲射中咗朗朗添！好彩閃避得切~ XD 唔好游咁近火山區呀！隨時會火山爆發㗎！~~~ 玩完一輪波波池，不如深入攀爬區探險囉！gogogo~ 話明探險，當然要準備好體力啦！我哋電量十足，即管放馬過嚟啦！ 摛高摛低，展開全面大搜索~ 遇到第一個考驗！要過對面，必須要通過呢條搖搖橋，膽量夠唔夠先？ 每跨過一級都十分之搖，腳震震，但依然信心十足喎！ 過咗橋之後，想繼續通過就要同障礙物打下boxing喇！噓~ 噓~ 明明係單程路，點會變咗來回雙程㗎？唔會覺得好擠迫咩？XD 遠方有海盜將至，快啲準備好大炮，擊退敵軍啦！ 喂喂！瞄準啲喎！唔好殺錯良民呀！@.@ 警告警告！船隻發生緊急事故，請各位立即跳海逃生~ 大家都表現得臨危不亂，有秩序地沿住三色梯瀡落海喇！ 危險速逃過後，又係另一個新國度，打韆鞦打得好hyper啊！ 練習得一身好武功，要為下一次逃生做好準備呀！ 另一位隊員都好畀心機練習，堅毅不屈嘅精神咪就係咁樣訓練出嚟㗎囉！ 朗朗向隊員大耍雜技，大家都正看得慶起呀！XD 隊員都想拜師學藝，但首要嘅係進行艱辛訓練，撐住呀！ 你追我逐！攀爬架就好似一個四通八達嘅迷宮一樣。不如我哋玩捉迷藏囉！1234.....10，朗朗要開始捉人喇！ 跑呀！跑得快好世界~ 跑時跑，要小心過每一關，唔好叉錯腳跌落岩漿呀！@.@ 波波池旁邊有一個啱細個啲玩嘅遊戲區~ 晴晴仲當自己係細baby，大玩瀡滑梯同玩具呀！^^''' 玩完動，不如玩啲靜態啲嘅活動啦！ playhouse有多款益智玩具可供借玩~ 一齊動動腦筋，考考智慧囉！~ 玩咗咁耐，都開始肚餓，等我介紹一下cafe部份啦！ Cafe區設有多張枱，枱與枱之間都算闊落，坐得幾舒服，環境唔錯呀！ 船內都有座位，如果響船內開餐，一定好有風味啫~ 船頭設有圖書角，啱晒喜愛閱讀嘅小朋友啦！ 親子嘅地方又點少得bb櫈呢？數量都好充足喎！ 仲提供埋BB即棄圍巾，夠晒貼心！ 點餐區都有埋海洋設計，好可愛，好靚呀！ 馬上睇下有咩嘢食先~ menu上有pizza、意粉同小食，選擇唔多，但就啱晒我呢個選擇困難症病人喇！XD (可按圖放大) 沙律、飲品同甜品 (可按圖放大) 開餐之前唔好忘記洗手呀！餐具同醬料可以自助領取。仲設有餐盤回收區，食完之後自助回收。呢種文化幾好喎！可以順便教導小朋友自己的事自己做~^^ 水係可以無限量添飲㗎！但大家記住要珍惜食水喎！ 事不延遲，介紹下我哋啲美食先~ 朋友order嘅蘑菇肉醬扁意粉，賣相好似ok喎！朋友話整得好好味，小朋友都喜歡~ 焗蜜糖雞中翼 - 晴晴就至鍾意食雞翼㗎喇！過到佢果關嘅就一定有水準啦！ 卡邦尼扁意粉 - 白汁煮得好creamy，味道調得啱啱好！好啱我哋口味呀！ 夏威夷pizza有火腿同菠蘿，好受小朋友歡迎！ 接收器突然亮燈響起，要出去攞埋最後兩款食物喇！ 千島海鮮pizza - 鍾意千島醬嘅一定會勁like，因為醬汁十分之豐富。我一塊接住一塊咁食，應該都食咗半個呀！勁好味！^o^ 同朗朗去親薩莉亞一定會同哋爭食田螺，所以佢特別要求叫呢個法國田螺焗薯蓉。但呢味稍為遜色，我覺得啲田螺韌咗啲，不試也無妨~ 又食又傾！Happy Time~ Happy meal~ 快啲食飽又去玩過啦！ 雪櫃啲甜品都好吸引喎！ 可惜太飽已經容不下更多食物，下次再嚟可以考慮嘆番個high tea呀！ 場地設有幫bb換片嘅地方~ 仲有尿片同濕紙巾提供添！真係照顧周到喇！ 六粒豆丁食飽玩飽，臨走仲有禮物收，梗係開心啦！Yeah!!! 「好好玩！媽咪幾時再帶我嚟玩過呀？」 一向都覺得親子餐廳重點不在於食物，因為醉翁之意不在酒丫嘛！但啲嘢食竟然好好味！呢點係幾有驚喜！Cafe樓底高亦係一個優點，空間感充足。無論玩樂於攀爬架，定係在cafe嘆美食，一樣都會覺都咁舒適。不過每個時段只得兩個半小時，似乎唔多夠喉。下次嘅策略應該係食飽午餐行一陣，再嚟嘆番個下午茶，玩樂時間就充裕好多喇！   要提提大家，無論大人或小朋友進入遊戲區都一定要著襪，如果冇嘅亦可以即場購買。入會成為佢哋嘅會員，咁入場費、搞party、報讀指定課程等都會有優惠㗎！有優惠梗係好啦！我哋兩大兩小入場費加食嘢，扣埋餐券都用咗$6XX(正價)，價錢稍貴。不過見到晴朗玩到忘我個開心樣，都覺得值得啦！好食又好玩！無論隨便嚟玩，一話係嚟開party，相信小朋友都一定會玩到唔捨得走呀！   最後畀多個tips大家！佢哋booking都好full，walk-in都幾難有位，最好係預早book定位啦！如遇電話長期唔通，絕對係正常嘅事。真係想去玩嘅話，親身去或者朋友去開順便book埋就至醒目喇！ PLAYHOUSE親子咖啡廳@新蒲崗Mikiki 入場費： 星期一至五 (公眾假期及特別日子除外) 小童 (1.3米或以下)＋一位成人 $150(獲贈咖啡廳現金券$30) 額外一位成人 $50 額外一位小童 $80 星期六、日、公眾假期及特別日子 小童 (1.3米或以下)＋一位成人 $220(獲贈咖啡廳現金券$50) 額外一位成人 $70 額外一位小童 $130 時段： 10:00~12:30 | 12:45~15:15 | 15:30~18:00 | 18:15~20:45 地址：九龍新蒲崗太子道東638號MIKIKI一樓119-120號舖 電話：2151 9611 網址：http://www.playhouse.com.hk facebook: https://www.facebook.com/playhousehongkong 營業時間：10:00 ~ 21:00   BLOGs: