平日番工打開個櫃筒，放滿嘅唔係文件，而係滿滿的零食。咬下食下時間過得快啲，又可以作提神之用嘛！食甜嘢，好多人都鍾意，尤其係小朋友啦！所以我哋特別嚟到台灣出名嘅專業糖果店，買手信之餘，又可以玩埋DIY，一舉兩得！ 菓風在台灣有十一間分店，而我哋將會去嘅係宜蘭店。門面裝修得十分有和風味道，就咁睇會唔會以為我哋去咗日本呀？^^ 宜蘭呢間分店設有DIY糖果班，事不延遲，入去睇下囉！ 晴晴一入到去已經被糖果吸引住，但係我哋嘅DIY課夠鐘喇！不如等一陣間先慢慢睇啦！^^ 工房一般DIY嘅都係圓捲形嘅棒棒糖款式，但節日期間，糖果主題會比平時特別。職員即將會教我哋整雞形棒棒糖，不過仲有一隻眼去咗邊呢？XD 晴朗都好專心聽書喎！聽完就要自己動手做喇！ 晴朗爸爸好忙碌，教晴晴搓糖同貼上雞嘅五官~ 跟住又忙著幫下朗朗手，辛苦晒！因為教室內唔畀拍攝，所以晴朗媽媽只好待在外面觀看。你哋要加油呀！ 另一位職員正努力為學員提供新鮮製成嘅糖果材料~ 由於新鮮嘅材料好熱，所以整嘅時候都要戴上手套。 加少少水份就可以將唔同部位貼好，係咪好簡單呢？ 雞形棒棒糖越嚟越似樣喇！ 朗朗都好努力，已經整得七七八八，好心急呀！ 話咁快，仲設計埋另一支自創棒棒糖添！完成喇！hohoo~ 包裝好之後，就可以帶回家囉！大功告成！Yeah!!! 晴朗心急得馬上拆開嚟食，睇嚟好好味咁喎！早知就唔駛包裝啦！XD 一於趁佢哋嘆糖期間，去買手信啦！ 嘩！好多款糖果！有牛奶糖、朱古力糖、釀梅糖、軟糖、硬糖等等，各色其色，款款都令人十分心動呀！ 呢個色彩繽紛嘅系列叫做「TRUE WORDS SAY IT ON CHOCOLATE」，全部都係朱古力。有咩嘢唔好意思講出口，就算係「感謝」、「對不起」還是「我愛你」，一盒朱古力咪就表達晒囉！ 包裝設計成唔同嘅台式小食店，好精緻！內裡係唔同款式嘅炒米餅嚟呀！ 仲有多款朱古力禮盒，其中以DIY嘅最特別，買嚟同小朋友玩下都好喎！ 唔同顏色嘅玻璃樽糖果，童年回憶又番番晒嚟！ 仲有好多好多款朱古力，bear bear形朱古力都好吸引呀！ 自選禮盒，每盒可放六款自選糖果，買嚟做手信又靚又好味！ 棒棒糖有大有小，好多款呀！ 而且仲款款都咁可愛，真係想帶晒佢哋番屋企呀！ 奇怪喇！點解好似去咗化妝品專櫃咁嘅？原來係佢哋新出嘅唇膏朱古力嚟呀！有藍莓、玫瑰、搸果、黑朱古力等口味。夠晒創意！ 最搞笑都係呢個系列喇！齋睇包裝真係會以為係藥、膠布、ｍ巾、condom，但原來全部都係糖果嚟！有朱古力、又有棉花糖，創意十足呀！XD 禮多人不怪！不停掃貨之下，就買咗台幣$3050手信喇！約港幣$812。攤晒出嚟先知原來買咗咁多~ 菓風真係創意無限，唔知真係會以為係ｍ巾嚟呀！食...m..巾.....XD 其實係棉花糖，軟棉棉，唔太甜，都幾好味！送畀人都應該會幾搞笑㗎！ 菓風小舖產品種類繁多，棉花糖、棒棒糖、朱古力、軟糖、健康果仁...等等，真係數之不盡。款款都設計得好精美，無論送禮自用都一樣咁有睇頭。最欣賞嘅係趣味造型糖果系列，好佩服佢哋嘅創意，未買已經覺得好好笑喇！我哋拆開咗其中一盒朱古力嚟食，食到個口卜卜聲，原來落咗啲爆炸糖呀！真係好有驚喜！唔怪之得可以成為台灣人鍾意嘅專業糖果品牌啦！除咗菓風工房之外，在新竹縣同埋雲林縣分別設有麥芽工房同巧克力工房。糖果製作原來咁得意好玩，有機會都想試埋另外兩間工房。好玩、好味、好購物！呢度絕對係遊宜蘭嘅必到景點呀！ 菓風糖菓工房 地址：宜蘭縣員山鄉賢德路二段188號 電話：03-9233569 網址：http://www.sophisca.com.tw facebook: https://www.facebook.com/confectionerystudio.sophisca 營業時間：10:00 ~ 18:00 FIND US on:       BLOGs: CONTACT US: