好掛住泰國既陽光與海灘呀, 過去兩年都分別去了華欣及芭提雅啦, 咁今年去邊好呢?! 不如去布吉啦, 雖然莎拉同謝菲都去過啦, 不過都已經係8年前既事了, 咁多年無去加上今次多咗陶寶B, 玩既嘢可以唔同呢! 就咁話啦, 心動不如行動. 由香港去布吉既直航選擇有港龍及泰航, 不過呢兩間既票價就一啲都唔平, 所以Budget行先就莎拉C9既本性, 所以最後選擇了Air Asia, 夜機去, 中午機返, 時間都唔錯呀, 就咁決定嚟一個5日4夜既布吉親子遊啦. 傍晚出發去機場, 時間好鬆動, 陶寶B已經一放學就已經十分期待啦! Check-in後, 呢位朋友就全程推行李, 佢話要出力幫吓手!  等呀等,,,,上得機未呀?!  好嘢, 終於可以登機啦, 我地出發啦, 布吉既陽光海灘, 我地嚟啦! 雖然廉航沒有電影睇, 但都無咩所謂啦, 點解?! 因為上機無耐, 呢位小朋友已經瞓咗啦.    3個鐘就去到布吉啦, 呢個新機場開了無幾耐, 比起以前舊機場又大又靚.   出咗機場, 搵到book咗包車既司機就出發去酒店了. 今次布吉行程既酒店安排就分開了兩部份, 因為第一晚到達酒店都差不多11PM, 所以就選了間經濟之選既Grand Mercure Phuket Patong Hotel. Grand Mercure連鎖酒店既品牌好出名, 酒店質素有水準, 上次係芭提雅都住過, 所以非常放心. 莎拉Check-in時, 雖然已經係11pm, 但酒店職員依然會奉上welcome drink及好好味既小泡芙. 房間唔算太細, 一家三口絕對無問題.  洗手間都好企理, 設計好modern. 雖然上飛機前已經食咗晚餐, 但去到酒店settle好陶寶b, 等佢瞓埋都差不多1am啦, 謝菲本來想出去附近食店買消夜一齊食, 點知食店都已關門, 唯有去7仔買杯麵啦.  但係杯麵又點可以滿足我地呢?!最後就叫咗個room service, pad thai, 估唔到個賣相咁精緻呢. 食飽就瞓覺準備明天既陽光與海灘了.