大約幾年前開始做婦檢時已經知道自己有卵巢多囊症同子宮內膜異位， 婦科醫生當時話我唔會咁容易有小朋友， 所以好早已經有心理準備唔會咁易bingo， 不過當時距離自己心目中生小朋友既年紀仲有一段時間， 所以件事都無放係心   其實我都唔係年年做婦檢架， 因為覺得都幾痛，直到前年年尾， 經期之間有不尋常出血，所以就去左做檢查， 檢查之後醫生話除左卵巢多囊症同子宮內膜異位之外， 我子宮仲生左粒息肉，仲要唔細粒添，所以其實年年婦檢都好重要   由於當時因為已經plan緊生小朋友，所以都有問醫生如果有BB既話呢幾樣野會唔會影響BB， 點知醫生竟然答：你有到先算⋯ 不過後來醫生都有講息肉其實有機會自然脫落， 叫我等多幾個月再睇下情況，如果自己唔甩就照試下造人， 試一年都唔得先考慮刮宮再試   一聽到刮宮真係幾驚， 因為自己好驚痛， 所以就上網睇下有無其他野可以幫助下， 原來除左呢d子宮問題之外， 宮寒同身體差都會影響生BB， 所以就決定先處理呢兩方面既問題， 身體差呢方面其實都係做下運動同埋早d瞓著手， 但宮寒就唔一樣啦   上網睇好多人宮寒都會睇中醫調理下， 但之前試過頸痛做針灸時頭暈眼黑呼吸唔到， 同埋屋企人試過睇中醫睇到身體仲差左， 所以覺得中醫係唔可以亂睇，咁岩果排開左好多蒸身既鋪頭，又話可以蒸子宮， 睇睇下就決定去試下   子宮咁重要既部位自己唔敢亂整， 所以我只係做蒸身同蒸腳既療程， 第一次去淨係試左蒸腳， 想試下效果同埋睇下環境先， 蒸完覺得效果都ok， 之後果次就試左蒸身， 蒸身既話感覺比較辛苦少少， 甚至有少少頭暈， 一定要量力而蒸， 唔好死頂， 蒸身之後感覺好似比之前無咁怕凍咁， 不過唔知係咪心理作用啦 （蒸身果間店其實我覺得有d hard sell， 同埋效果應該間間都差唔多， 所以就唔介紹啦）   我一共蒸左兩次腳一次身， 突然有次M到夜晚M痛到不得了，比平時M痛痛好多， 完全瞓唔到覺， 第二朝去廁所， 竟然見到有粒好似手指公第一節咁大粒深紅色既肉， 粒息肉就係咁樣自己離開左我身體， 之後因為太忙我都無再去蒸身， 但運動就一路有繼續做， 唔洗刮宮個心都安樂左好多   歡迎follow我facebook專頁：Miku媽媽&大舊