仲記得我生完第二日已經上奶，因為第一胎唔識，又食咗止痛藥唔知自己谷得好犀利，到母乳顧問黎睇先知，結果要佢幫手放奶仲要按摩，誇張到可以餵完仔仔兼再泵滿1支，當時以為自己一定唔擔心餵奶問題啦！但原來多奶都唔係一件好事！ 出咗院之後，跟姑娘教餵完仲谷就泵啦…因為我本身乳頭短，所以頭嗰2星期已經出現乳頭裂開，後來仲真菌感染要返健康見醫生拎藥膏，以為咁已經好慘情?!未算！因為我一路都有泵，其實奶量一早已經供過於求，日日個胸都谷到石頭咁，結果我又去泵，如是者最高峰我一泵去到15安，當時我淨係識諗仔仔有儲備，返工都唔擔心啦，結果到第3星期開始，右胸出現硬塊，點按點啜都出奶出得好慢，所以我又返健康院見醫生，醫生開咗抗生素俾我，佢話可以照餵BB嘅，仲叫我泵前熱敷，泵後冰敷，好可惜過咗2星期都無好轉，胸頂仲出現紅腫添，所以我又再返去覆診，醫生開返相同嘅抗生素俾我，叫我如果發燒就要去急症室喇。 去到第6星期已經泵唔出，右胸頂勁紅腫，手都遞唔高仲發燒到39度，當時老公帶咗我去急症室，分流安排咗緊急類別，見醫生時，佢首先話食藥唔可以再餵BB，要熱敷兼要住院，入院去到外科病房有醫生睇完同樣話食咗藥唔可以再餵BB，今次就話要凍敷，我當時心諗好亂呀！明明健康院話啲藥餵BB無問題架嘛，仲要又話熱敷又話冷敷，聽邊個講呀@_@" 入院當晚醫生用超聲波照到胸頂紅腫部分積咗好多奶係度，所以用針筒係胸頂抽出黎，睇住佢抽啲麥精咁嘅顏色嘅嘢出黎，好痛好可怕！之後第2日安排咗我去乳痛中心再見醫生，我覺得自己係實驗品！佢地由我乳頭嘅乳腺出口插支管入去話可能可以幫到手，仲要插咗入去之後影相，痛到我眼淚係咁流，結果仲要一滴都無出(Ｔ▽Ｔ)，最後都要再次係胸頂抽，真係流咗好多眼淚…… 到最後終於安排我見返母乳顧問，我同佢講咗啲醫生個個講嘅都唔一樣，而佢都承認唔係全部醫生都有母乳知識嘅，所以出現咁嘅情況，黎到哩度我要同各位媽媽講，餵母乳首先要自己意志堅定，如果唔係聽到啲唔識嘅醫生講真係好易無辜地放棄咗！講返先，母乳顧問教，當出現硬塊，千萬唔好再大力按壓（其實無事都唔好大力）泵奶前大約5分鐘要用彈琴手勢由上向乳頭方法輕輕力彈落去，之後先再泵會好啲，泵奶時間一定唔可以超過30分鐘，如果雙泵其實10分鐘就可以喇，泵完要冷敷令自己唔好再造奶（因為我已經供過於求），另外可用雪凍椰菜避開乳頭冷敷都有幫助，最後亦係我覺得最有用就係食卵磷脂，我最嚴重嗰陣食緊1日4粒，之後一路減到每日1粒，塞嘅位置真係慢慢通返，但留意返卵磷脂會令脂肪變細，所以會令奶變稀，BB就會易啲餓，所以就要餵密啲，無事嘅時候就唔好食喇！ 成個過程我足足用咗個半月先好返，而且自此仔仔都唔再食右邊胸喇，因為奶係甜，藥係苦，發炎時係鹹，同一時間有咁多味，抗拒都正常嘅……(ㄒoㄒ) 所以我係靠左邊餵到佢歲半???? 我有少少心得，如果剛出現硬塊feel 到塞塞地，可以去沖個熱水涼“wu”低身用花灑對住塞嘅位沖再用手輕拍fing下個胸，之後出黎再埋身/泵就會出到，如果BB埋身嘅話下唇對住塞嘅位都好快啜通，如果都唔得，其實老公都係一個好幫手，唔洗怕羞架(ง •_•)ง,加油