早個零星期小JM先病完，誰知轉個頭小JM又撞傷， 攪到呢排無咩胃口食野，每餐都只係食一半就停。 媽媽真係擔心到一個點。。。   為左吸引小JM既食慾，同幫小JM增強一下體質， 今日媽媽決定煲個靚湯俾大家飲。 不過而家天時咁熱，似乎煲啲清甜既湯水會比較吸引。   咁岩行經街市見到平時菜檔姨姨度有紅菜頭， 所以媽媽就二話不說，一於煲「紅菜頭甘筍粟米豬骨湯」啦！   你咪睇紅菜頭成舊圓碌碌、紅卜卜，以為似蘿蔔咁簡單， 其實紅菜頭係好有益架，營養纖維亦好高， 醫學亦都證明左對降低高血壓有幫助添架！   不如一齊了解下紅菜頭既好處啦！   紅菜頭既益處： 1.）有助增多腦部血液循環 2.）增強體力 3.）有助降低及穩定血壓 4.）有助通便 5.）具有抗氧化功效 6.）有抗癌作用   除左以上幾點外，其實紅菜頭仲係一種低脂、高纖維既食物， 紅菜頭含有豐富既胡蘿蔔素，但無膽固醇，而且低熱量同少澱粉質添！ 真係岩晒一家大細，亦都岩愛靚一族同各位靚媽、靚太們。   紅菜頭甘筍粟米豬骨湯 材料：     紅菜頭            一個 粟米            一條 甘筍            兩條 豬骨            適量 南北杏            適量 蜜棗            一粒   做法： 1.）    先將紅菜頭、粟米、甘筍、豬骨洗淨     南北杏、蜜棗浸洗   2.）    紅菜頭、甘筍去皮，     再將紅菜頭、甘筍、粟米切開備用   3.）    豬骨洗淨後，以滾水煮約 15-20 分鐘。 撈起沖水再備用。   4.）    先預備一大煲水，煮滾後就將以上材料放入，     待水滾後轉慢花煲一個鐘左右即成！          有需要可以因個人口味而加入適量既鹽      但因為紅菜頭本身係清甜既，所以無預先係煲度落鹽。        但好可惜我唔記我影碗湯， 只知道一晚2大1小清晒成煲湯。 而小JM仲食左好多紅菜頭添，可能係因為甜甜地既關係啦。 最後小JM仲自己拎住啲粟米來食， 食到好津津有味咁。   ＊  其實唔落豬骨都一樣咁清甜，就連素食者都岩飲添！＊   媽媽可以加入其他既湯料配搭，變化出唔同口味既湯喔！               ♫ ESDlife靚太Club 。 星級榮譽會員 ★ sleepyceci  ♬ ♩ BK Milk。親子語。駐站Blogger  ★ 傑。斯與晴  ♪ ♫ Mami Buy香港媽咪幫。駐站Blogger ★ 傑。斯與晴 ♬ ♩ Ohpama。Oh爸媽。駐站Blogger  ★ 傑。斯與晴  ♪ ♫ 媽媽經 。 駐站精選Blogger  ★ 傑。斯與晴   ♬  ♩ Ubaby Magazine。駐站Blogger  ★ 傑。斯與晴  ♪   歡迎追蹤 小JM 既Fanspage 「傑。斯與晴」： 如有任何查詢/合作，歡迎聯絡我同小JM 參與產品試用或者各樣活動 媽咪既Email係： sleepyceci＠hotmail.com 小JM既Facebook Page： 傑。斯   與   晴 （Jolie Babe。小JM の 成長印記）