突然想分享一下,之前為菠蘿油王子揀尿片心得。   懷孕時係咁易爬過文,到小王子真正出世後,就不停試用唔同牌子既片片。 由於一直產檢,都話小王子屬於中碼偏細BB 所以入院前就準備左H牌初生0碼俾佢用,因為好多媽媽都話FIT到漏油! 出院後一直都用H牌,點知有一日,小王子兩隻大脾仔又紅又甩皮,攪乜?! 即刻幫小王子搽下屁股膏啦。 但 搽左2日都唔好,唯有搵御醫睇睇,結果診斷為「念‧珠‧菌」作怪!   下?!乜唔係女仔先會有既病黎咩??男仔都會有..... 明明每次換片前都會用皂液洗手..... 御醫話男BB都常有,搽過幾日藥膏,小王子既皮膚好番哂了!   然後,拎左塊白P sample片片用。 一攞上手,感覺比H牌軟熟D喎,於是就將H牌打入冷宮,即刻轉用白P! 後來又再爬文,原來有唔少媽媽都用日本牌子既片片 所以我又命人去買左日本Moony番黎 事關D媽媽話比較啱細碼BB用 (嗱,各下既BB係大碼B就咪亂用哩個牌子啦!爆片就唔好啦下話~) 咦?!日本片片仲軟熟過白P喎! 而且爆片情況好少出現,真係感覺良好呀~ 於是,日頭我就俾日牌片片小王子用,夜晚訓過夜就用白P。   直到小王子漸漸長大,係時候由初生碼轉用S碼片片 於是,又命人去買左另一日牌大王S碼返黎試用 咦?!點解日日同我爆片既,咩料子?! 即刻命人買番Moony S碼番黎先無事喎! 究竟咩事呢?明明都好多媽媽揀大王用架! 於是我就拎哂幾個牌子既S碼片出黎 (如圖) 雖然全都係S碼,但都已經有高矮肥瘦之分!   哩次經驗所得(以我小王子為例呀下) 每次轉碼之際,先用Moony,開始覺得size唔太啱,但又未夠磅數轉碼時,就轉用大王/白P 另外爬文睇過,另一日牌花王都多媽媽揀,但size比較大塊,適合大碼BB用 所以一直唔敢買俾小王子試用。   另外順便提一下,白P同綠P點分 (因有媽媽提問過) 第一,就係產地問題,白P大大隻字寫明係日本製,較多媽媽用得安心D 而綠P只會得D細細粒係個封底果種,寫住台灣入口既 第二,價錢呢,無記錯好似係綠P平D 第三,講到吸力,皇后我就覺得白P比綠P吸得好D啦!   好啦,講住咁多先,希望小小心得幫到下大家啦!