原本既預產期係7月24~ 進取既媽媽本身打算前1後9，所以7月15先正式放產假，點知！就係7月15既零晨1點幾就見紅啦！ 見紅之後，好快就開始有啲M痛既感覺，大概7-8分鐘就痛一痛~ 我同老公都好冷靜咁係屋企行行企企，同2隻貓講話可能好快就帶多位貓奴返屋企~等到2點幾開始每5分鐘痛一痛就call車去瑪麗了~   係坐車既途中開始覺得痛得勁左，但都忍到既，不過痛嗰時有啲標汗~每次痛既時候我都有乖乖咁鼻吸、口呼咁深呼吸~(係助產侍朋友教既，雖然痛緊時好嬲，不過真係幾有用，因為要放鬆先可以快啲開夠度數去生！） 去到醫院後，護士見我未穿水，所以都係做左手續後，用部機check下幾耐宮縮咁~我好乖咁係床到一痛就鼻吸口呼~而老公就係出面等~   到左4點幾，我覺得已經唔係好忍到個痛，護士就俾左啲香薰我，為既都係relax下，但其實有乜可能痛緊既時候relax...所以有2下我痛到無鼻吸口呼，一直谷住度氣，對手勁想捉住自己啲頭髮狂抆！但又怕真係抆甩啲頭髮，我真係太理性 :p   到左5點幾，由於真係太痛同太密，我就叫護士幫我檢查，但因為未穿水，護士都唔太想檢查，因為怕未開度數，每一次檢查都怕有細菌感染！點知我原來已經開到6度！所以護士就拿拿聲推我入產房同叫老公準備~(正常開3度已經可以送入產房有老公陪~)   入到產房，助產侍話多數等一胎就每但鐘開一度，所以好快嫁啦，我心諗仲要4個鐘真係人都癲，所以繼續鼻吸口呼，再加助產侍幫我按背同聞下笑氣。但聞笑氣令到我好想嘔，最後我都唔太想聞...所以我靠自己好努力咁放鬆，鼻呼口吸~差唔多7點，助產侍再檢查就話已經差唔多生得la!!(由6度到9度大概只係1個鐘多啲@0@)   生既過程都真係好似痾屎咁，跟足助產侍既指示呼吸，痾既時候要有節奏，谷住度氣大大力痾！ 最後只係痾左十幾下就痾左出黎啦 :p 跟住就到全程都勁緊張既老公進行剪臍帶儀式！老公係咁讚我好勁好叻，估唔到我忍到個痛仲要生得咁快，又無用無痛！(用無痛既話有機會令我出唔到力生，所以我好理智咁一開始就無打算用無痛 :p) 瑪麗既助產侍真係好好，一直係到讚我做得好好，又讚BB好合作~所以成個產程都好快，正常第一胎平均要陣痛10個鐘再加一個鐘生，但我只係一共用左6個鐘乍 :)   到聯傷口既時候我仲忍到郁都唔郁，因為我怕一郁會聯得唔靚之後更痛>"<...所以助產侍係咁問我平時係咪唔怕痛既人，但我其實係抽根會痛到喊既人，只係生既時候超級理性，唔想自己慘慘豬所以先乖乖合作 :)   生左之後阿b只係抹下身就光脫脫咁爬係我個身到，由於我無帶住眼鏡，所以一直都睇唔清阿b個樣，不過感受到佢既體溫真係好開心~我都有讚阿b好乖，咁快出到黎，不過又話佢做乜唔等多兩日先出世，因為媽媽卜左去食芒果自助餐...宜家泡湯了...T.T...   生BB既過程宜家諗返都覺得好神奇，雖然痛緊既時候好難做到放鬆，鼻吸口呼...但一諗到可以加快流程就覺得一定要理智地完成！因為有得揀真係唔想痛咁耐嘛 :p   所以各位準媽媽，想加快生產過程既話記得要乖乖聽足助產侍既指示呀~     我終於都幫蠔豉妹妹開左FB la~大家想睇佢日常無聊事就可以睇下:p 蠔豉妹妹之貓奴生活 Facebook : 80後的人妻「旅」友  Instagram : https://www.instagram.com/wingring/ 邀稿 : wingring417@gmail.com / wingring@ymail.com