落咗咁多日雨，終於見到太陽伯伯喇！可能知道我哋要上堂，所以咪特別天公造美囉！晴朗十分期待第二堂游泳課，之前一晚已經不停講喇！但其實佢哋究竟係想玩水定真係咁有學習精神㗎？我估都係玩水居多喇！一齊睇下佢哋嘅上課程況囉！今次為晴朗準備咗泳鏡，睇落係咪專業咗呢？XD 教練首先同晴朗熱身一下，在池邊踢水~ 然後就開始練習番上堂教過嘅嘢喇！同上次唔同嘅係，佢哋去咗泳池最深水嘅地方練習呀！@.@ 晴晴因為對腳掂唔到地，失去安全感，有啲情緒~ 反而一向驚驚青青嘅朗朗表現淡定，仲做到教練嘅要求添喎！ 溫習完上次嘅動作之後，教練要求朗朗扶住池邊一直爬過去淺水區~ 晴晴似乎依然好驚深水，攬到教練實一實~ ^^''' 一於暫時離開一陣深水區，等晴晴冇咁驚先再試過啦！ 繼續練習浸落水度吹泡泡，學習水中呼吸~ 熟習一下浮板應用之後，又再向深水區挑戰喇！ 一話要過深水區，晴晴不安嘅情緒又番番晒嚟！仲喊到成個泳池都震晒添！^^''' 慘慘豬囉！扁晒咀~ 係需要一啲時間等情緒平伏落嚟嘅！ 咁就朗朗練習住先啦！今堂真係對朗朗嘅勇氣另眼相看呀！ 雙手揸住浮板，身體放鬆，向深水區進發囉！^o^ 晴晴見哥哥做到，都慢慢開始攞出勇氣，努力嘗試喇！ 教練初時會在旁扶持，協助一下晴晴保持良好姿勢~ 適應咗之後，就放開手等晴晴自己一個感受喇！ 竟然冇喊！仲做得好好添！我哋都一齊鼓掌為晴晴加油呀！*o* 將難度升級，今次要試埋邊浮邊踢水~ 踢水動作未係做得好好，教練在旁指導~ 晴晴又變咗隻樹熊，黐實教練喇！XD 跟住又再戰深水區，今次晴晴冇揸浮板都OK喎！冇喊之餘仲努力跟教練指示做，好有進步！ 最後，再齊齊練習多次水中呼吸啦！ 晴朗練習得多，個頭都開始浸得多啲落水裡面喇！ 真係越練越放膽去做~ 晴晴都大膽咗好多呀！做父母嘅見到小朋友進步梗開心啦！^o^ 今堂實在係太多預料之外，冇諗過一向大膽嘅晴晴會咁怕深水，亦估唔到朗朗一啲都唔驚，仲覺得好好玩添！其實都有聽聞過有啲小朋友學游水會喊住咁上堂，原來真係會驚水驚到喊㗎喎！不過好彩教練經驗豐富，在軟硬兼施嘅情況之下，晴晴只係喊咗半堂，之後都肯嘗試喇！仲笑番，同朗朗一齊整蠱教練添！以前佢哋學興趣班都遇過好多唔同嘅老師，經驗話畀我知如果太腍善係會被晴朗「蝦」㗎！教練惡得嚟又同晴朗玩得埋，啱喇！就係呢一type先治得到佢哋。教練總有辦法應付晴朗唔同嘅要求同情緒，好佩服呀！今堂最大嘅進步就係由驚變成唔驚，要克服內心對深水嘅恐懼都唔係咁易㗎！期望晴朗下堂可以做得好啲，有更多嘅改善同進步啦！ 重溫GO SPORTS「活力暢游」系列：第一課 - http://blog.xuite.net/chinglongtin/blog/516876609  Go Sports Swimming Club 查詢及報名熱線：2690 0445, 6686 6337Facebook: https://www.facebook.com/Gosportssc FIND US on:      BLOGs: CONTACT US: