去玩最好係玩得夠癲，去食就梗係要食得夠爆啦！講梗嘅係人氣旺盛嘅「爆丼屋」呀！恨咗想試好耐，終於可以拋低晴朗，兩口子去撐枱腳喇！勁心急、極度期待，一齊嚟睇下係咪真係咁夠爆先！ 爆丼屋位於人來人往嘅旺角中心地帶，聽聞冇得book位，而且成日都大排長龍，所以我哋比晚巿早少少到達。5點左右，未見人龍，但嚟攞飛嘅人就越來越多。等咗大約15分鐘就有位，都算快喎！ 入到去見到成間舖都坐滿晒食客，原來咁早都有咁多人嚟食飯，餐廳真係好爆呀！ 呢度提供免費wifi，password已經大大隻字寫咗響牆上面。仲唔即時connect然後打咭？XD 仰望天花，啲燈原來排咗一個「丼」字出嚟！仲用紅色燈來突顯中間果一點。雖然店子細細，但店主都花咗唔少心思喎！ 嚟得呢度，梗係試佢哋主打嘅丼飯啦！款款都咁吸引，淨係睇相已經流晒口水喇！(可按圖放大) 除咗丼飯之外，仲有手捲、沙律、串燒、壽司同刺身~ (可按圖放大) 落完order，就快可以食到喇！望住印有爆丼logo嘅紙巾，心情好興奮呀！ 嘆陣茶，止下渴先啦！ 唔駛一陣，兩大碗丼飯上枱喇！心情何其澎湃，好震憾呀！*o* 晴朗爸爸嘅「北海豐盛丼」，材料有帆立貝、三文魚籽、海鰻、左口魚裙邊同埋赤蝦，呢個咩嘢都有嘅飯就啱晒多心嘅佢啦！三文魚籽粒粒都咁大粒，咬落去咇晒啲魚油出嚟果下感覺超爽！燒左口魚裙邊生熟程度啱啱好，海膽好鮮味，三文魚夠肥美，帶子大粒厚肉，同赤蝦一樣咁鮮甜呀！ 「三色海膽盛丼」就啱晒我呢個海膽狂熱份子，材料包括來自北海道、加拿大同韓國嘅海膽，啲海膽滿滿咁鋪晒響飯面，真係好壯觀！對於中咗海膽毒嘅朋友嚟講，見到一定會瘋狂啦！三款海膽都好鮮甜味美，而且厚身有質感，最緊要係新鮮呀！大滿足！ 卜卜脆嘅新鮮紫菜包住啲飯同刺身一齊食，就好似食梗壽司咁。好好味呀！ 飯量夠多，體積夠大，賣相夠晒爆！飲埋跟飯嘅麵豉湯，飽到冇朋友~ 硬係覺得個飯爭咁啲嘢咁，加埋「爆丼屋」玉子咁至夠perfect！(偷嘢呀~)XD 「爆丼屋」果然夠爆！我終於明白點解啲人會一窩蜂咁去食，仲要排好耐隊都在所不計。佢哋價錢唔平，但係質素高又係真嘅！啲丼飯份量真係幾多，海鮮啖啖肉好足料，而且非常新鮮，服務都唔錯呀！不過環境上比較擠迫，啲人多數食飽就走。見到出面大排長龍，你都唔好意思坐得耐啦！今餐真係好好味、好滿足！係我哋想要嘅嘢嚟！雖然價錢略貴，但係物有所值呀！ 爆丼屋 Big Bang Don地址：旺角豉油街50號地下8號舖電話：2332 2918facebook：https://www.facebook.com/bigbangdonhk FIND US on:      BLOGs: CONTACT US: