不經不覺仲有10幾日小喬就3個月大 真係時日太快無知小孩一晚長大 好似剛剛先生完點知又話3個月 呢段一打二既日子真係只可以話攰!攰!同攰! 好彩有婆婆過黎救援下! 係呢段期間好多人問家姐有無呷妹妹醋 唔鍚妹妹，蝦妹妹....過百種問題 答都答到好似背書咁 係妹妹未出世之前,家姐早已好期待妹妹既來臨 我都成日同家姐傾計,話妹妹係家姐架~ 得你先可以叫妹妹,係你至親密既老友記! 而你2個永遠都係媽咪既心肝寶貝! 家姐似懂非懂咁~話佢會好好保護妹妹~ 的確2個幾月黎，家姐真係一個不可多得既小幫手！ 多Ｄ放手比佢參與，佢真係覺得妹妹係屬於佢 小事叫佢拎下尿片，去煮飯望住妹妹，拎奶咀比妹妹等等 大事幫妹妹沖涼，餵妹妹食奶(*當然呢D我會係旁邊睇住) 佢一一都做過,只要一起身就搵妹妹GOOD MORNING* 訓覺又同妹妹GOOD NIGHT* 有次仲同我講(媽咪,你去沖涼先啦,我睇住妹妹得架啦) 的確當我沖完出黎,佢真係企係妹妹隔離哄妹妹訓覺! 有時真係唔好覺得小朋友幾歲識D咩呀, 唔係架，只要家長肯放膽比佢地嘗試，佢地做到既野好多都會超乎你想像！ 至於家姐有無呷妹妹醋，說實話唔多唔少都會有 初初妹妹一返屋企，一陣就要食奶，一陣又要泵奶 一時間由２４小時陪伴變到得２４分鐘，點會唔開心 但隨住妹妹大個，同媽咪開始習慣２個寶寶點分配既時候 咩叫呷醋??已經無左呢回事啦!! 大喬與小喬:https://www.facebook.com/ckkbbq/