作為半個HR，我都叫做對in人有多少經驗！不過對於in/揀陪月姐姐，我就真係心荒荒...話晒第一次自己係老闆身份請人，加上又唔了解陪月到底有乜日常工作要做...所以都咪話唔緊張！好彩宜家既陪月姨姨都ok~咁我日頭先可以休息下，話晒餵母乳既媽媽真係每2-3個鐘就餵一次，如果中間既時間無人幫手，真係會無得休息T.T...   暫時作為半個過來人，以下有幾樣野請陪月姐姐，作為孕婦/準媽媽既你係要考慮同留意既~ 1. 陪月姐姐既經驗 拿，湊過自己生既唔代表佢識湊初生bb...我都剛生左，但我好明顯唔算有經驗係咪？個人覺得起碼要湊過5個以上初生嬰兒先算ok~   2. 價錢/Budget 呢樣其實就好睇陪月姐姐幾有經驗~大致上分左以下價錢~ $12000-$16000 初生bb 0-5個 $16000-$20000 初生bb 6-15個 $20000以上 初生bb 15個以上 / 有湊雙包胎或以上經驗 $24000 星級陪月~唔sure湊左幾多個，但就湊過啲明星、藝人既bb~加上有好評   3. 証書/學歷 基本上大部份陪月姐姐都有陪月証書~ 有啲姐姐有學埋點樣按摩胸部去增加/通乳~更有啲有中醫底、烹飪証書，識得點煲湯、煮好西~ 個人覺得如果想餵母乳既，揀一個識按摩胸部既會好啲，因為塞乳線真係好常見...   4. 工作時間/日數/OT 多數陪月姐姐既工作都係09:00-17:00，一個月26日工作天~如果要長時間或晚上、通宵工作既陪月姐姐選擇會更少同價錢會貴啲~ 至於OT，有啲陪月姐姐就唔會計，有啲會講到明每30分鐘加幾錢~好多時去母嬰健康院嗰啲日子都會要姐姐遲收工，所以問清楚好~   5. 僱主推介 收得$18000以上既陪月姐姐多數都有好多僱主推薦信~佢地會好主動拎出黎，因為呢樣其實係最值錢既 :p   6. 傳統/新潮 有啲陪月姐姐係超級傳統的，唔俾沖涼、洗頭，只可以用薑水抹身，12朝、滿月都有啲儀式要做~ 另一種陪月姐姐就soft d~我自問唔係一個乖既新手媽媽，沖涼、洗頭呢啲保持衛生既行為我係唔會放棄 :p  所以太傳統既陪月姐姐就唔太啱我...   7. 利是/車費 其實車費我都明既，因為有啲陪月姐姐住得好遠，額外俾車費我覺得係ok既~ 不過要求利是我就...本身我都打算俾開工同滿月利是，但係我有見過一位講明一定要，仲要每封$500以上，我就唔ok囉，咁不如你係人工到加$1000感覺上會好好多...=.=   8. 取消條款 其實準媽媽揀好左陪月姐姐後就緊係唔會無lala取消啦，除非不幸地最後唔需要坐月...有啲陪月姐姐係呢啲時候會退返訂金，有啲就唔退~ 而如果開始叫左陪月姐姐黎發現唔係好夾，多數頭7日就俾7日通知後就可以解約，過左7日後就點都要做夠一個月為止，大家簽約時要注意~   9. 代煲薑醋/雞酒 大部份都收$500-$1000再加料錢~同埋要預早係預產期2個月前約時間，因為都要預早最少一個月前煲~ 而雞酒因為只需要12朝當日準備，所以就唔洗額外收錢，只要俾買餸錢就ok~   10. 餸錢/補品錢 有啲陪月姐姐會問定你有咩唔食而準備定一個食譜同埋補品都會有一個list~咁可以叫屋企人買又得，叫陪月姐姐買又得~ 如果叫陪月姐姐買，記得問清楚係開工當日先俾定錢再扣數定到最尾一日先計數~話晒錢銀上既野都係一早講定好~     我就係跟據呢10樣野而去揀陪月的~宜家陪月差唔多黎左一個月，大致上我都幾滿意~仲有大半個月就會開始沒有陪月的日子，所以等蠔豉妹妹滿月後，我就要學沖涼同用奶樽餵奶了...T.T...係工人姐姐未到時，我呢個新手媽媽希望應付到啦！     我終於都幫蠔豉妹妹開左FB la~大家想睇佢日常無聊事就可以睇下:p 蠔豉妹妹之貓奴生活   Facebook : 80後的人妻「旅」友  Instagram : https://www.instagram.com/wingring/ 邀稿 : wingring417@gmail.com / wingring@ymail.com