過往成日見到Playright 主辦同協辦嘅活動，都想去玩，因為遊戲元素充滿創意、好吸引，並非一般攤位遊戲，填顏色、掟波波就完了。但朝瞳媽好怕人多，朝瞳出世以來去大型活動真係一隻手都數得晒! 不過… 暑假，總要為孩子搵啲節目， 柴娃娃開心一番。 見到 「智樂遊樂車之探索大自然遊學園X 動物農莊2017」，有Playright 遊戲加持，又係室內的確幾吸引! 但對’動物農莊’ 呢部份就有啲保留，後話啦! 當日，星期日我地中午出發，去到東涌站轉乘城巴特備「X1」線去亞洲國際博覽館，都好易去! 而購票就係7-11完成，到達入場都唔洗排隊，一切都好順利。只不過場內都真係幾多人..(汗) 一入場就見到大恐龍，朝瞳睇左好耐 場內都有好多部份，等我數下先~ 1. Playright 遊戲 (依我記憶…) +木工區畀小朋友設下拎鎚仔、dum釘，扮拎住油漆油牆~ +玩沙區，一大遍沙池畀小朋友任玩。 +海綿池畀小朋友成個瞓落去，掟嚟掟去! +水管配搭吹風機 以上都唔洗點排隊，係自由進出! 所以，我地都玩左好耐 2. 大型遊戲同工作坊 +有分 “未滿3歲" 及 “3-12″歲可以玩嘅吹氣設施，即係滑梯、爬石、跳彈床，仲有騎馬仔、迷宮等等大型遊戲區。 +玩呢啲遊戲就要排隊，平均15~25分鐘左右，睇受歡迎程度。朝瞳未滿三歲，好多都排得快嘅。 +現場仲有好多手工藝工作坊，不過係派籌，我地就冇刻意去排了 超鐘意sir滑梯! 吹氣設施每次限3-4位小朋友玩，所以都輪得快嘅。 3. 動物農莊 +有幾個位置都展示左小動物，例如有兩大個圍欄圈住小羊仔，到指定時間工作人員就會派草畀大家餵羊仔 +有爬蟲區，展示左陸龜、水龜、蜥蝪，有小動物區，展示倉鼠、兔仔，工作人員會不定拎小動物畀大家摸下 +有恐龍模型同沙池 (不過，動物咁樣係室內，畀咁大班人同時圍，我就感覺唔係幾好~ 我亦冇花太多時間同朝瞳睇動物，有心想畀小朋友接觸動物，都係去番室外、公園等地方。) 4.攤位 +搞得咁大型活動，冇幾個參與選點得呢，現場有大會嘅主辦商(好似係Baby-mo ) 派免費sample，盒裝奶、出奇蛋、魚油丸等等，一大袋!! 不過都用左20分鐘排隊… 最失敗我唔記得影低有幾大袋…. (哭哭) +當然仲有幾個兒童食品攤位，同大家玩遊戲派小禮物、試食咁，有時間嘅媽媽絕對可以掃全場，拎好多免費sample 與偶像合照(笑) 不斷自己行去拎試食(大笑) 綜合嚟講，「係好玩嘅!」朝瞳都玩到笑哈哈，不過呀爸呀媽就攰啲咁啦! (苦笑)   如果下年你都想一家大細去，可以參考一下或者Bookmark定啦!