聽過見過太多朋友話自己小朋友偏食, 或者唔鐘意食野, 對食物無興趣, 所以好早既時候已經決定女女要行BLW。仲睇左有關書本俾自己有個概念。 一般都建議係6個月開始, 而阿女係5個半月既時候我就開始俾佢用BLW加固啦。我對佢有信心係因為見佢已經坐得直, 乜都放入口, 對食物有興趣, 自己可以用手放匙羮入咀, 放食物近佢咀佢會開口。屋企開飯既時候會俾佢望住我地食飯等佢學下點樣咀嚼。 依家試左一個月, 款色其實唔多變化, 初初最主要係要夠淋身, 又可以整成條狀或者一角俾佢攞住食。煮法全部都係烚同蒸, 方便我呢個唔叻煮野既阿媽。 初初嘗試既有: 西蘭花, 菜芯, 菠菜, 三色椒, 冬瓜, 南瓜, 白菜, 牛油果 有啲生果比較難用手攞住, 又或者易噎到, 就用咬咬樂俾攞住食: 香蕉, 蘋果 到左6個月, 我就開始俾佢試豬肉, 將免治豬肉再整碎啲整成條狀 有時真係無野食, 我就會開糊仔俾女女食, 重點係俾佢自已用羮放入口。媽媽可以幫佢將食物放係匙羮上面。 最近俾佢試埋蕃薯, 不過太乾佢似乎唔多鐘意食, 加啲水搓條狀就好啲。 過左一個月, 佢已經唔鐘意用咬咬樂食蘋果, 因為無野落肚嘛, 就俾佢試自己拿住食, 但一定要全程望住佢以防噎到, 佢又食得好開心完全無問題喎! 每次食完俾佢飲少少水, 但呢個妹豬唔多鐘意飲水囉。 人地話開頭係玩多, 但女女係一個小吃貨, 所以一開始已經食得好唔錯。當然會有好一部分送左俾地下, 但見住佢一日一日進步真係好滿足! 長輩對BLW會有微言, 媽媽就要俾啲信心自己同小朋友啦!