天氣咁熱，如果唔係玩水嘅話，帶住小朋友進行戶外活動真係NO WAY呀! 所以轉戰室內嘅活動，而今次我哋去到沙田文化博物館，入面嘅兒童探知館消磨時間同埋放電。   喺呢到可以讓小朋友發現大自然嘅奧妙、懷舊玩具展、閱讀區以及體驗昔日香港的農村生活。展館分咗8個遊戲學習區， 認識鳥類、海洋生物、昆蟲及動物 呢個區有一個模仿米埔沼澤區，有條小斜橋，讓小朋友認識水中嘅魚、雀鳥、海洋生物。     基圍蝦嘅遊戲 小遊戲區，將手仔伸入去個袋仔入面，就可以扮隻鳥食蝦同蟹仔啦~~ 輕按台上嘅按鍵，就會發出「吱吱」嘅雀仔叫聲。   動物看世界 呢幾款動物造型嘅扇型其實係乜東東呢?  眼睛位置會模仿該動物睇嘢嘅視覺畫面，蝙蝠嘅話係會好黑好暗，雀鳥睇嘅嘢原來係紅色，蜻蜓就有複眼而且係好似放大鏡咁。    蜻蜓嘅複眼，仲係放大嘅~ 鳥類睇到嘅野原來係紅色。   感受水世界 呢個魚缸最特別之處就係，小朋友可以走入去，然後伸個頭去魚缸睇魚。請放心，係唔會濕身嘅，因為佢係有個半圓型嘅罩小朋友可以多角度咁睇魚。 鳥類世界 透過電腦遊戲、簡單遊戲認識雀鳥、等生物。 呢個互動至式嘅雀鳥公仔，真係好得意，鳥頭同鳥身部份係有磁力，可以俾小朋友做配對。      昆蟲世界 呢隻咁大嘅其實係蟻后嘅放大版，最版我仲以為係飛蛾嚟~ 仲有住喺山洞嘅朋友，會有啲咩呢? 有我最鍾意嘅兔仔，野兔…   放大左嘅螞蟻同埋蜘蛛。   「香江童玩」展覽 入面有昔日本港設計、製造嘅玩具，仲可以重溫經典玩具，有啲玩具舊到我都未見過呀。 仲有兩個大型嘅棋類遊戲「鬥獸棋」、「飛行棋」。 我諗鬥獸棋一定係爸爸們最鍾意玩嘅遊戲嚟。爸爸們係咪，即刻棋癮大發呢? 鬥獸棋同飛行棋，我比較鍾意玩飛行棋，不過每次擇骰擇到3次「六」就要返大陸，諗起都好唔開心~ 睇返以前啲玩具真係同而家好唔同，同埋以前好興鐵皮玩具呀。 原來以前啲煮飯仔咁逼真，我都想玩呀!!!! 一齊玩搖馬仔? 不過家長要留意呀，部分展品係唔可以坐上去玩，只供觀賞。 經典公園遊戲跳飛機，而家公園真係好少呢個遊戲啦，其實我覺得幾好玩丫，又可以訓練小朋友腳仔嘅肌肉、同埋協調，單腳跳、雙腳跳咁，要鍛鍊先做到。   七巧板，我仲記得以前讀書係有一課要學玩七巧板，所以細個每個人都一定有一套七巧板喺手。 諗落其實七巧板真係好好玩，又可以訓練小朋友動動腦筋，同埋啟發佢哋創造力。   農村生活體驗    昔日香港農村生活，話時話我都未經歷過，我諗婆婆o個一代先經歷過。而我覺得呢到係另類嘅煮飯仔場地，和牛B真係好鍾意玩煮飯仔。     ▲   煮好飯，上菜啦~ 以前嘅廚房同爐灶，剛剛好放一個大鑊，米缸同水缸就係咁樣放喺到。 ▲ 負責擔水嘅小村姑 (哈哈) 煮好飯餸當然就係要一齊開飯啦，一家人齊齊整整食餐飯，喺而家呢個社會我諗除左做節先會比較齊腳。 小朋友玩得最投入、最開心，都係農村生活呢個一區。   閱讀區 如果比較文靜啲嘅話，可以去閱讀室睇圖書，入面都有好多圖書睇~   每個區都會有一個介紹板，我好欣賞佢哋用紙做嘅浮雕畫，真係好靚呀!     香港文化博物館「兒童探知館」@沙田 地址：新界沙田文林路一號 (兒童探知館位於地下) 開放時間： 星期一、三至五：上午 10 時至下午 6 時 星期六、日及公眾假期：上午 10 時至晚上 7 時 聖誕節前夕及農曆新年除夕：上午 10 時至下午 5 時 星期二(公眾假期除外)、農曆年初一及二休館 -------------------------------------------------- 歡迎聯絡我&和牛B，參加產品試用和活動: email: chungying56@hotmail.com Facebook專頁: 80's Mami – 和牛B嘅成長專頁   -------------------------------------------------- 姊妹合作**Precious M accessories** 利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。