親子日，今日嶠爸放假，去左太古鰂魚涌半天遊。一早就去左太古荷花office，嶠媽同芊嶠為《媽媽寶寶》雜誌做model，期待10月號，多得芊嶠，媽媽又有機會上雜誌！ 之後去左太古城，嶠爸話返工又係太古城，放假又返太古城。我地今次係去誠品搞既《森林的禮物·繪本展·》。平時芊嶠係一個活潑女孩，成日周圍跑跑跳跳，估唔到有書睇，佢都會坐定定睇。嶠媽覺得哩個展d書好正，好大本，入面又好多色彩，唔怪得會吸引到小朋友坐定定又睇到眼定定，連嶠媽我都忍唔住睇左幾本。不過由於我地屋企太多書都未睇得哂，所以今次嶠媽冇買書 (輸)，買贏。哈哈，又講d無聊野，就係突然諗起細個行街，個陣就來開學，成日有人問買唔買書，芊嶠婆婆永遠既對答都係「我買贏」，諗起問佢果個人答唔到落去都想笑。 打完書釘，明明芊嶠話好眼訓，係bb車到又話要訓，細佬又係揹帶到訓左，原本話去怪獸大廈影相，咁既然來到都去睇下啦！點知去到芊嶠又未訓，同佢影影下細佬都起埋身。其實嶠媽都係見到朋友穎媽一家之前去完，所以又想去一轉影返幾張靚相。唔講唔知，我地去到影完一邊，嶠爸話前面好似都有一棟有同樣既風景，行遠少少，原來真係。另一邊既風景靚好多，前面個邊好似成地都係其他野，而且搭左棚，後面就反而冇咁多雜物同其他野，但我地兩邊都有影，後面既景靚之餘，細佬又起左身，又影到全家福，梗係鐘意多d啦！ 半天遊之後，大家都勁累，係車上面訓左一覺，返到屋企樓下就食下午茶，同埋哩排係農歷七月，所以我地就買餸返屋企煮飯，唔出夜街喇！今日影到咁多靚相，嶠媽真係好開心。想影靚相既朋友，趁哩幾日好天，可以同男女朋友，或者老公老婆，又或者一家大細去影返幾張沙龍。好似話哩個星期尾又打風，不過打風落雨都可以去太古城，帶小朋友去打下書釘，鐘意既買返幾本書比小朋友都好，我覺得從小養好閱讀習慣係可以訓練小朋友既專注力。 ～～～～～～～～～～～～～～～～～～～～ 《森林的禮物·繪本展·》 地點：太古城中心 日期：8月10日至9月3日 時間：10:30 - 21:30 ～～～～～～～～～～～～～～～～～～～～ 《怪獸大廈》 關於：怪獸大廈是由海景樓、福昌樓、海山樓、益昌大廈及益發大廈五座相連、呈現E字型的舊樓群組成。由於外型龐大，猶如一頭怪獸座落英皇道，故被街坊稱為「怪獸大廈」。 ～～～～～～～～～～～～～～～～～～～～