原來轉眼間已經做左媽媽年半啦， 日子真係過得好快。 隨著日子慢慢咁過，時間慢慢流走， 小JM轉眼已經歲半了！ 亦意味著小JM已經慢慢成為幼童，唔再係「BB」啦！ 當然，係爸爸媽媽心中都依然係BB一名啦！ （離 Terrible TWO / Trouble Two 不遠矣） 回想起當初同小JM初次見面，感覺依然令人感動。 希望小JM一路都可以健康快樂咁成長。 既然到左一歲半，又點少得要去健康院檢查呢？ 一歲半既健康院檢查依然會有評估既小測試， 測試完仲需要打針添架！ 而今次小JM暫時未需要係健康院打針住， 因為我地幫小JM 安排左去私家診所打針， 所以健康院既一歲半針就可以唔需要打啦！ 呢一點爸爸媽媽們就要留意返， 要根據自己小B既過往打針紀錄而安排係邊打針啦。 今次小JM唔駛打針，所以爸爸今日無陪我地一齊去健康院， 由媽媽單人匹媽半拖半抱小JM咁出發去健康院！ 早係小JM未檢查之前， 媽媽我已經聽到好多身邊朋友講解有關一歲半健康院的小測試， 甚至有朋友更提及如果小B被斷定為「不合乎標準」既話， 就有需要係小B兩歲既時候再一次返去健康院進行評估。 雖然當下小JM媽有被嚇倒， 但我依然相信小JM呢個佻皮豬係可以能夠應付到， 所以聽後都並無對小JM進行額外既「訓練」， 我地依然相信每位小B都有自己既成長準則， 分別只係早或遲些少學識而已。 所以小JM媽亦希望爸媽們不要因為見到或聽到評估內容而對小B進行訓練， 更不要因為人家既小B做到而要教自己小B做相同既事。 請試著俾小B空間自由發展， 令小B可以發揮更多既無限想像，啟發更多既潛在能力！ 好了，事不延遲啦，入返正題。 今次就等小JM媽媽為大家解說一下而家健康院既檢查同一歲半針需要注意既地方啦！ 小提示： 爸爸媽媽們記得、記得、記得要帶健康院既手冊同小B既針卡喔， 以便醫生及姑姑們做紀錄嘛！ （因為很重要，所以要講三次！ 不要嫌我煩就可以啦！） 打針衣著小提示： 因為需要打針既關係，建議為小B們穿上比較容易穿著既衣物， 最好可以選擇腿部能夠解開既夾衣或者短褲短裙仔為佳， 以方便醫護人員為小B打針。 因為小JM既預約時間係朝早既九點鐘，時間有啲早， 所以我同平時返工既時間一樣起身準備， 再幫小JM換衫，準備帶小JM去健康院進行檢查同打針。 去健康院前當然都不忘為小JM準備早餐啦！ 健康院檢查流程大曝光 去到健康院既時候， 健康院嬸嬸會提示爸爸媽媽到登記處先為小B登記， 以便姑娘安排派發籌號及安排檢查。 小插曲： 就係媽媽差不多登記完個陣， 小JM個傻豬豬唔小心將岩岩買既早餐整跌左， 仲要小JM只係食左少少幾口咋。 可能小JM已經知道整跌左無得食， 所以都指住左個麵包，話：噢！（雙手打開示意無左。）Dirty！ 我就唯有同小JM講麵包跌左，無麵包食係啦， 好彩小JM都無扭計，仲肯乖乖地坐定定俾媽媽清潔返好個地方。 媽媽清潔好晒就再幫小JM清潔多次手仔，再俾餅佢食係啦！ （當媽既點都有兩手準備既！） 完成登記手續後就只需要等待姑娘「叫名」， 便可以到檢查房為小B進行簡單檢查。 檢查主以以磅重為主： － 為小B磅重及紀錄 小提示： 小B已經一歲半，所以係唔駛除去衣飾磅重， 但需要小B除去鞋子，自己站立係磅上。 （如尿片已濕，建議先換好再磅重，以免影響有開數據紀錄） 完成以上步驟之後就可以帶小B到等候區， 等候面見姑娘／醫生（按需要而安排）。 與姑娘面見 姑娘將會根據小B既月齡及剛才既檢查紀錄再對小B進行評估， 而評估則會分為兩部分進行： 第一部分： 姑娘會向爸爸媽媽查詢小B既各項狀況及發展 姑娘會向爸爸媽媽進行提問， 以便了解小B既日常生活及各樣習性， 問題大概如下： 1.）主要由邊個照顧 2.）一日會飲幾多餐奶及份量 3.）加固情況及進度 －一日食到幾多餐固及每餐既份量 －加固既食物種類：如菜、肉、魚之類 －茶點類型：如水果、芝士，麵包等 4.）說話能力 －主要想了解小B既說話能力 如小B能夠說出超過20個單字／疊字就算合格 5.）行路情況及進度 －小B可以自已行走不需扶助 6.）識唔識得用水杯 及 戒用奶樽既習慣 －要小B開始使用學習水杯 7.）正確指出身體各個部份 －如： 眼、耳、口、鼻、頭、手、腳、肚仔同Patpat 8.）識唔識用匙羹進食或餵別人進食 －如已經懂得自行進食就已經係好叻架啦！ 問完晒以上問題之後，姑娘會俾一個小小既測試小B。 第二部分： 測試小B既手指仔靈活度 小測試： 姑娘會預備好四粒不同顏色既積木， 再示意小B將積木疊起。 只要小B成功疊起積木就完成及通過小測試架啦！ 出賣小JM時間 係姑娘好專咁幫小JM寫緊紀錄個陣， 小JM就拎起左姑娘既 Date Chop， 可能小JM以為係玩具啦， 因為姑娘將Date Chop將左係距離積木相近既位置。 姑娘有提議小JM將Date Chop交還， 小JM都有示意俾返姑娘，但點知原來係撩姑娘玩，即刻又縮返收埋。 呢個時候就俾另一個姑娘見到小JM笑， 兩位姑娘都俾小JM攪到笑笑口，仲話小JM好攪笑。 還好最後小JM都有乖乖將Date Chop還返俾姑娘， 臨走仲有同兩位姑娘拜拜， 唔係就真係失禮啦！ 完成晒面見姑娘同做評估後，姑娘多數都會提返媽媽出去等打針。 但因為小JM安排左係私家診所打，所以姑娘就有特別既安排。 姑娘俾定左一個回郵信封俾小JM媽， 原來係要小JM媽等小JM打完一歲半針之後將針卡既紀錄及正面影印及寄回， 以便健康院做紀錄。 最後，姑娘會提示媽媽要係小B 四歲既時候再預約安排驗眼， 同時姑娘亦會附上預約流程俾媽媽，以作參考。 而小B下一次再接種疫苗既時間就會係六歲， 即係小B到時就已經讀小一架啦， 姑娘都有提過六歲針係會係學校打既， 媽媽就唔需要再特別預約啦。 一歲半針簡介： 健康院所打既係： 四合一加強劑 即係：白喉、破傷風、無細胞型百日咳及滅活小兒麻痺混合疫苗既加強劑 而呢一針有別於之前所打既針， 因為呢一針唔係打大脾架，要打係手臂。 好彩小JM今次唔係健康院打，係要去私家打返五合一加強劑，所以依然可以打大脾仔。 （即係：白喉、破傷風、無細胞型百日咳、滅活小兒麻痺 及 乙型流感嗜血桿菌Hib 混合疫苗既加強劑） 不過今次真係喊到豬頭咁囉～ 好彩爸爸係度呵返， 一出房門口就已經無喊，仲有同姑娘講拜拜添！ 私家診所多數打完針都會有開定退燒藥以防萬一，以看門口之用。 完成晒打針之後，媽媽就要將有關既紀錄寄返去健康院做紀錄架啦！ 如果唔係姑娘話會不停追你添。 ♫ ESDlife靚太Club 。 星級榮譽會員 ★ sleepyceci ♬ ♩ BK Milk。親子語。駐站Blogger ★ 傑。斯與晴 ♪ ♫ Mami Buy香港媽咪幫。駐站Blogger ★ 傑。斯與晴 ♬ ♩ Ohpama。Oh爸媽。駐站Blogger ★ 傑。斯與晴 ♪ ♫ 媽媽經 。 駐站精選Blogger ★ 傑。斯與晴 ♬ ♩ Ubaby Magazine。駐站Blogger ★ 傑。斯與晴 ♪ 歡迎追蹤 小JM 既Fanspage 「傑。斯與晴」： 如有任何查詢/合作，歡迎聯絡我同小JM 參與產品試用或者各樣活動 媽咪既Email係： sleepyceci＠hotmail.com 小JM既Facebook Page： 傑。斯 與 晴 （Jolie Babe。小JM の 成長印記）
