產後2個月-----修身進行中 陀芊羽之前有53KG+長年累月啤酒肚嘅我，反而有咗之後戒啤酒，同聽做健身教練嘅老公話飲食少糖，令到我喺成個孕期非常清瘦（我生之前last磅係55KG） 由於同各位媽媽一樣，學湊B已經冇哂精力，有時間都用黎眠一眠，根本唔好講咩做運動，所以對產後修身，真係冇咩要求 餵人奶嘅媽媽，仲係要不停食，不停飲。 坐月嗰陣，我係要中午食2碗飯同成碟肉，夜晚都一樣。 咁食法，仲講咩減肥呀？ 原來，聽老公話唔會發達，但間中聽都係有著數。 老公同奶奶set咗一套看似冇特別嘅坐月餐單俾我，飯係冇減，唯一大重點係少糖，瘋狂飲炒米茶同湯水。 喺冇得運動（我開刀）嘅情況下，雖然冇馬甲線，但都維持住至少唔係肥媽嘅狀態。而且仲好精神呢 46KG，係我宜家嘅重量。 媽媽們，先忍下口唔食糖分高嘅嘢，你會有驚喜!!   以下就係我大概食嘅 : (冇用酒類煮任何野，因為怕過俾BB) 早餐係最自由，奶奶每日係買大家樂俾我食，飲品可以飲好立克唔加糖 指定食品 雞蛋X2隻 可選1 上海麵1碗   火腿通粉1碗   瘦肉粥1碗 午餐 指定食品 白飯X2碗 可選1 蟲草花蒸排骨   梅菜/馬蹄蒸肉餅   蟲草花/木耳蒸雞 晚餐 (都可以揀返午餐嘅餸) 指定食品 白飯X2碗 可選1 洋蔥豬扒   冬菇瑤柱蒸雞   冬菇栗子炆雞柳   叉燒炒蛋   薯仔炆排骨 其實食嘅野同一般月子餐大同小異，不過極少糖調味。