如果喺香港，開設「關愛襟章」，然後按需要分高、中、低等級；當大家見到有人戴住，就要讓座。我諗所有大肚婆都會想要一個！ 搭地鐵、巴士時，如果你見到有3個人，一個係約7個月嘅大肚，第二個係約5個月嘅大肚，同一個六十幾歲嘅老人家，你會讓座俾邊個呢？ 記得有一次，我如常上咗巴士返工，當時座位已滿，有幾個人喺走廊企。幸好有個好心太太讓咗佢嘅關愛座俾我，令我唔洗係15分鐘嘅車程中，心驚擔跳怕撞親個肚，真係非常感謝！後來到咗下一站，我坐位旁邊企咗一個五十幾歲嘅中年女士。隨之委屈就咁開始… 中年女士用佢雄厚嘅聲音係我旁講：「後生唔好坐啦，要讓人坐。」開頭，我反應唔切，因為車廂內有好多後生的，而且我大肚緊，原全唔知道佢係講緊我。後來，佢嘮叨咗幾句，拍一拍我膊頭，我先醒覺，佢所講嘅「後生」係我！ 當時我猶豫咗一陣 ，我係咪應該讓座俾女士呢？我同佢之間邊個較需要呢個座位多啲……喺我未反應得切，而女士繼續情緒高漲，最後我忍唔住回咗句「我都大肚啊！」 其實我知道大肚並唔係大晒，只係晨早流流被一個唔相識嘅人無因由咁批判，覺到無限委屈。我唔係有心霸住座位，而係我有確實嘅需要！後來，我諗深一層，可能佢同我一樣都係有確實需要，所以先會開聲有咁嘅表現，於是我企起身，讓女士坐了。 我企起身之際，身後一把溫柔嘅女聲響起：「你坐丫！」有人再讓我坐，超感動～可以唔駛對住個女仕咁尷尬。女士呢一刻瞥咗我個肚一眼，「原來你大肚架！」以上事件發生喺我懷孕已5個月之時，肚就好似一個小蜜瓜咁大，加上我已出聲表明我大肚，其實唔明點解女士會睇唔到，聽唔到。 誤會就此告一段落，我頓時有種沉冤得雪嘅感覺！其實孕婦不時都會遇上類似情況，通常發生喺未見肚嘅懷孕初段，但呢個階段嘅孕婦更需要座位，因頭3個月好多時都是流產嘅關鍵期，一定要多休息坐坐同小心保護BB。大多數香港人都好願意讓座，但前提係佢覺得你好有需要。 大肚搭車小Tips: 1) 收埋高踭鞋，換上平底鞋。 2) 護住肚子，揸穩扶手，就算車程短，企時都唔好玩電話。 3) 如果你每日車程時間好長，又未必時時有位坐。請控制好鹽嘅攝取量，少食鹽量較高嘅醃製品，可以攝取優質蛋白（如肉、蛋、奶及奶製品、大豆及豆製品等）及含鐵豐富嘅食物（如動物肝臟等），防止腳腫。我由陀森林5個月開始，腳就腫到生產，當時返工來回車程都要1個半鍾，真係異常痛苦！ 4) 減少揹大袋，一來重，二來遮住大肚身型；如果係繁忙時間，好多人會因為睇唔到而撞到你。 5) 老實講，未見肚時其他人好難察覺到你係孕婦，所以可以著大肚衫、戴口罩突顯自己係孕婦。 6) 準爸爸，如果可以的話，請陪大肚婆搭車吧！ 希望各位準媽媽見到呢篇文章之後，可幫到你哋喺繁忙嘅地鐵、巴士等公共交通工具上保護好自己同寶寶啦！