係檢查果時姑娘有同我講要check下手術室幾點有位，唔一定7點就可以有手術室，入到候產房姑娘就幫我搏左部機check住bb心跳同宮縮情況，等到大約4點左右，我開始感覺到傳說中既陣痛啦，果種痛就好似搞肚痛就快要痾出黎果種痛法咁，起初痛得疏d，之後就開始愈黎愈密 之前我已經download定記録陣痛既app，但之前無試用過，當時又好緊張又好眼瞓，我同老公完全研究唔到個app係點用，建議準媽媽們要事前研究下d app點用先 一路等既時候姑娘終於confirm我地7點有手術室可以用，就幫我地打比醫生叫醫生到時過黎接生，到大約6點就有姑娘拎d手術帽，橡根果d比我，等整理好小便埋，老公去病房鎖好行李之後就推我落手術室 落到手術入左第一隻門之後老公要坐係第二隻門出面等，我入左第二到門之後就有個好似停車咁既位置，係果到對左d個人資料，麻醉師同我講左一堆野，等埋醫生，之後再對多次資料就入第3隻門啦 入到去我真係好驚，呢到可能會有少少記錯次序 入到去之後姑娘就叫我自己過床，跟住隻手粒豆就開始搏住野，醫生就叫我打側身預備打麻醉藥，打麻醉藥係無傳說中咁痛既，打完3支之後就已經無感覺，之後就綁住我同插尿喉，跟住老公就入黎啦 老公入左黎之後醫生就話宜家試下位先，我同老公講左唔知幾多句野(10分鐘都無)，之後麻醉師係我上面按左一下醫生就話bb出左黎啦，我地就聽到bb喊聲，姑娘抺一抺bb之後就抱比我地睇同話比我地知bb出世時間，第一眼見到bb真係好感動，姑娘幫我地影完相就抱BB去另一邊，老公就過去剪臍帶，之後BB就比兒科醫生檢查 (我地BB係輕磅BB，所以先要有兒科醫生跟埋入手術室，正常係無兒科醫生既) 老公返左黎同我講左幾句野，醫生就話開始聯針叫返老公出去，聯針果時會感覺到個肚有比人推下拉下咁，聯好針之後就推返我去等入手術室果個停車位，check住心跳同血壓，check左一段時間無問題再等返醫生過黎話ok咁就可以推返上房，老公就一直坐係等入手術室果個位到等我出黎，仲話等左好耐好擔心，跟住就一齊上病房啦 歡迎follow我facebook專頁：Miku媽媽&大舊