係2017年7月份時，知道自己有左BB真係好震驚！雖然一直以黎早結婚早生BB係我好想做既事，不過太突然都令我到好驚，好無安全感。 一黎家境唔富裕，無得靠父幹／母幹。二黎自己岩岩畢業，工作薪金都只係一個Fresh Grad價，加埋男朋友既薪金，都未必可以負擔到BB生活，好怕會害左BB既將來。   但幸好係呢個時候，我身邊有個Supporter出黎支持鼓勵我 令我有勇氣去做一個負責任既媽媽。佢話「愛先係小朋友最需要既野」，就算佢讀國際學校、上好多興趣班、著靚衫，但缺乏「愛」，小朋友更多物質享受，成長都唔會開心。當然現實既問題都要面對，但為左BB，自己買少件靚衫、出去食少幾餐，再加自己再努力D，我相信BB都可以好開心健康咁去成長！自己都係由貧窮家庭長大，我覺得我長大後都唔會比其他人輸蝕，正正因為窮，我好少既事都已經可以好開心，唔會睇唔起人。就算唔係生於富裕家庭，都一樣可以好生性好開心。 當捱過最爭扎、苦惱既階段，其實諗返都覺得有左BB呢件事真係好開心！有左小朋友，個人有動力左，仲即刻充滿母愛，除左食得好健康，成日去游水之外，已經諗緊第時同BB去邊到玩，點樣既模式同佢相處、買咩衫仔等等。小朋友唔係一個壓力，而係一件開心事，唔係咩？可以同BB減少個 generation gap，同佢做到朋友，基因又好D，其實都係一件值得感恩既事！始終我相信「兒女係上天比我最大既祝福」。上天比得一件事發生，証明佢都相信你一定有能力去面對！ 分享完小小既心路歷程，當然要簡短講下懷孕後要準備既事啦！ 1. 知道自己懷孕後，盡快去私家診所／家計會驗孕，驗到後就會出一張懷孕証明比你，（最好Copy多一兩份，工作上都有需要比一份HR）。 2. 到自己所屬既地區既母嬰健康院／醫院，遞交你懷孕証明＋住址証明＋身份証去排期。 因為自己住個區係要直接去醫院排期，我都好快咁比晒資料醫院，Around 12 weeks就會進行唐氏檢查 詳情查詢要前往去醫院，可以睇返呢條Link：http://www.fhs.gov.hk/tc_chi/main_ser/process.html  3. 剛剛發現懷孕，要盡快調節飲食，最緊要健康健康健康！！ 下一次再同大家分享初初懷孕需要補充咩類型既營養品，同埋舒緩害喜既情況啦！   歡迎媽媽們一齊交流／了解更多90後做媽媽既點滴！將會有更多有趣，扮靚、健康、育兒等等既心得分享！ Facebook：https://www.facebook.com/90sMummy/ Instagram: https://www.instagram.com/minarainlo/