好多人成日都話小朋友好曵，成日扭計好麻煩。其實爸爸媽媽們，有無好好同小朋友傾下？做個好朋友呢？ 由大喬出世以黎，一直我都好少用媽咪既身分去同佢相處。當然係適當既時候，我都會用返媽咪既身分去教導佢。我成日都話，有左大喬除左佢成長，我亦跟住一齊成長。 到而家呢一刻，可能好多人眼中我未必係一個好媽媽，但至少我係大喬眼中係一個好媽媽，亦都好慶幸大喬自己本身都好乖。 甘究竟我同家姐係點相處呢？ 係屋企我成日都會突然叫「家姐」「寶寶」等，然後打開雙手叫佢攬住我，或者錫我係呀，好似d情侶甘。但每次做呢個動作，家姐都會好開心甘行埋黎，有時甚至唔洗叫，我坐係到，佢從後擁抱我，sweet到爆(不過呢個應該好多爸媽都會做) 每晚pillow talk，係！每晚幾夜都好都會傾，就算重複聽過都要聽，家姐每日都好鍾意分享佢當日發生既野，就算係我全日同佢一齊佢都可以當你見唔到甘講返你知。佢成日都會「媽咪，我講埋呢件事先」，一講就停唔到。但係千祈唔好阻止佢哋講，小朋友鍾意你先會同你分享佢哋每一日開心唔開心嘅嘢。有好多爸媽，甚至係大喬爸爸都會覺得夜啦快啲瞓啦，又或者講咗囉你咪又講。係呀係夜啊但係都係夜多10分鐘姐，每一日可能抽10到15分鐘同佢訓前傾一陣計，起碼你又知佢發生咩事佢又會覺得爸爸媽媽係佢哋傾訴者，到日後長大有啲咩佢都識得話你知，同埋佢係乜都同你講係爸爸媽媽同小朋友之間嘅信任，記住寶寶咁細個佢未必識得同朋友分享佢嘅事但係爸爸媽媽就係佢哋嘅第一個朋友，你都唔聽你都唔傾佢仲可以同邊個講邊個傾？ 聽寶寶的話，其實家姐有陣時似媽咪多過我，有陣時係會佢管教返轉頭， 咁你會唔會話我係一個失敗嘅媽咪要個囡教返我轉頭？ 我覺得唔係，正如我之前話，我同佢都一齊成長緊，反而咁樣我覺得家姐佢足夠有能力可以處理某一啲事佢知道咩叫啱與錯，好簡單我同家姐去行街睇衫，家姐會話媽咪唔好再買啦你有好多衫啦，你着埋啲衫先啦屋企冇位擺啦(語氣似足個阿媽話女)。係呀嗰一刻即刻將件衫放返低，點解？又買咪比人話囉， 呢頭同個女講話要珍惜同節儉，唔可以亂咁買嘢屋企咁多玩具無必要再買，同樣而家佢話我屋企成屋都係衫我再買的話，咁我點可以話佢唔可以買玩具呢。（但係有啲人會覺 得你點可以咁嘅態度同媽咪講嘢架，媽咪買野要你批准咩？亦有啲媽咪會覺得小朋友用一啲唔係小朋友應該有嘅態度去同你講嘢或者會出聲話你係唔啱，其實係我眼中只要你唔係用粗口同我講我就覺得冇問題。身教係最基本，係小朋友眼中你明明已經有好多某一樣嘅嘢，但係你都繼續去買，咁點解相反我係你眼中我有好多玩具我都想買點解你唔俾我買，你自己又買得我又唔買得？) 另外，過馬路，綠公仔閃紅公仔，幾多人都不停衝，我自己都會，好似等多一分鐘都會死甘，家姐會拉住話危險，唔準過！綠燈先可以過。的確係呀，除左我有同佢講過，學校又有教，佢都會記住，要小心，比車撞到會入醫院。所以佢會記住停低，而我久而久之習慣左佢呢一套，綠燈安全過馬路模式。 待續。 大喬與小喬：https://m.facebook.com/ckkcwk