好鬼忙，去左一個長旅行返嚟忙到依家!終於可以打返篇文! 下次先講去左咩長旅行，因為太長.....長到我未有時間打! 但旅行完返嚟就收到學校面試通知! 話說我本身都唔鐘意搞到好緊張既人，但偏偏好多人搞到我勁緊張.... 聽得最多係: 你仔讀書未呀? 讀邊間呀? 開始報名啦喎!報邊間呀? 報咁少? 讀唔讀N呀?唔讀好輸洩架! 我由心水三間比佢地嚇到我報左6間!由最近既搞到我要報埋唔就腳既.... 諗左好耐揾左好耐睇左好多....唔係心水就真係好唔係心水.... 三間最近我既居然係官塘區排名頭三....咩事呀....咁勁架咩......我諗我仔都無行..... 首選靈糧但勁快截止....明明睇好左日期偏偏個兩日唔得閒上網，遲左三個字.......藍田靈糧報名已截止....兩日時間....只係遲左三個字...咁只好報近地鐵站既鑽石山啦!但入數入左藍田靈糧戶口...原來有分...好彩佢都比我去IN(10/11)呢間無N班，之前撞到街坊佢話藍田既有N班所以收細B K1難好多，試下係無N班既鑽石山!又會有呢D野既....咁我都知既, 上過N班都已經有過學校生活，又真係好D既，老師都舒服D啦! 咁我又驚驚地啦，但出年讀N又大B啦!我又唔想....唔理啦，鬼叫今年唔讀N咩.... 次選啟思!!!個個都話HAPPY SCHOOL，好想入呀!!!!!!!!!!(4/11IN) 三選迦南!其實佢辨學目標我都鐘意，但10個有8個同我講好谷，但將來入到好學校就係佢啦!嗯........入到先算啦，咁易咩.....(2/11IN) 之後報埋玄圓....但同我既心水差好遠，入唔到基督教學校都揀無教會好D...但有時去公園見佢D學生又真係幾有禮貌又好照顧我仔仔，咁就心郁郁，不過算啦，由佢啦!!! 報左九龍灣小樹苗，因為基督教同埋近奶奶，有咩事叫奶奶落去睇睇都快過我搭車既!但評價麻麻...... 再報左康盈中英文幼稚園(已IN) D老師出名好，但極度唔就腳....... 我早左半個鐘就到康盈，因為我都幾緊張下...個日學校出面有攤位玩遊戲，其實我仔真係無咩耐性排隊...但搵野分散佢佢都唔會走開，但真係要勁分散佢先得囉....明明呀媽成日教佢排隊又叫佢比D耐性，眼見好多小朋友都好有耐性等我就覺得呢間都未必收...仲有，有街坊同我講左好多面試中點但我當耳邊風... 就算通告叫你一個去，你都要帶埋老公去，如果唔係學校會當你唔重視唔係首選... 當日我確實見到好多父母一齊去既....而且著到都好正裝而我只係牛仔褲波鞋.... 一開始入去交完報名費就一大班入晒遊戲室玩煮飯仔，之後玩左陣就一同入去音樂室同老師們唱歌跳舞，我仔都玩得好開心!而且佢都有一齊唱，但佢真係所有事都慢半拍....算啦!唱完跳完老師分左份禮物比各位小朋友，係一個沙槌!我仔就啦啦聲要打開個透明袋!心諗其他小朋友咁乖唔洗打開既!!!真係好呀!!!係呀，我真係同人比較下，因為點解我仔會咁架....坐定定得唔得呀...最慘等個別面試我仔係咁想走，又唔比佢玩得音樂室D野....所以我錯了...... 終於叫到佢名，係走廊等既時候仔仔郁身郁世坐唔定....不過我都由佢，當自己屋企啦! 到學生面試一切都好順利!!!! 名識答, 歲數識答, 性別識答!!! 老師呤左顏色圖形板叫佢呤D顏色出嚟....撞中左三個，一個佢趕唔切都未聽老師講就呤埋，最後一個老師問咩色，佢答唔識....比佢吹漲真係....老師叫佢砌返晒入去，勁快!!!! 之後外籍老師一齊，呤左盤水果用英文問佢WHAT IS THIS?我仔呆晒只係指住香蕉話蕉蕉又係咁想呤提子....但當老師叫佢比BANANA老師佢又比，比提子媽咪佢又比，放返D野入盤佢又執好晒!所以老師話佢幾好!!! 咁我自己都覺得佢真係幾好既!!!但到等見主任時....佢係走廊係咁行嚟行去又話要走....我下次要帶本書同佢玩先得!!!失敗@@ 見主任問我點解揀呢間學校啦，問我係咪好唔就腳啦!其間我個仔係咁同主任講想畫畫.......呀......我答我仔先定答主任問題先呢....主任問我仲有無報其他，我答另外仲有一間但首選係呢間!咁就問完!!!因為我仔太煩，主任話我仔好識表達自己!!!! 係呀....但我覺得過左火....... 終於走得...... 今次其實當練習都好既，下次真係要準備好D....下次係迦南.....真係好緊張囉!!!!!!!!!     康盈中英文幼稚園: http://www.hongyingkid.edu.hk/