話說係滕滕未出世前已經入手左Graco Bb車 當時揀車條件有下面幾項要求 夠闊落 - 想滕滕坐得舒服 穩陣 - 初生安全最重要 雙向 - 新手媽媽心態寶寶不能離開視線範圍 全遮光罩 - 訓左覺豬都唔使曬親 價錢 - 唔超過二千五 最後一田Bb展就入手左依款車 用左一年 用後感如下 除左阻街 上小巴巴士會論盡 一個人要坐車出街用唔到之外 確實真心好用 尤其係初生階段   (唔介紹依款車住 入返今次正題先) 因為滕滕已經一歲 訓覺時間越來越少 但又未識行路 滕媽開始心思思入手輕便型Bb車 方便一個人出街同去窄小小多人地方 起初心儀Gb Pockit+ 因為可以較角度  但真心貴呀 最平B展價都要1800 諗到屋企已經有架車 又1516 淘寶見到有個牌子叫Baby yoya 佢有隻皇牌款都幾多人買 但滕媽睇中嘅係新款 外觀似Pockit+  重點價錢唔使400人仔 購物狂媽媽開始心思思 諗左一排 終於膽粗粗入手依款 近似Pockit嘅Bb車   先黎個開箱比大家睇下先   打開後見到有個收納袋入住 架車係平時大車高度一半左右 可以上飛機唔寄倉 跟一個收納袋同扶手 注意：扶手開收時需要拆掉 第一次用需要自己裝返個轆先可以用 依張相係較左平訓 同Pockit+一樣   上面依兩張就較坐直同加左扶手  腳踏位都較低左 老實講 開箱後覺得架車幾靚仔幾實淨  比我想像中好 第二日比滕滕試坐 係屋企來回推左一陣就訓著埋 開收方法淘寶都有影片 所以我就唔作介紹 實測開收都算幾易同幾順 應該係前面兩個轆做左萬向輪關係 單手推都唔成問題 推過凹凸路都唔算太震 滕滕都幾鐘意坐  唔會扭出黎 試過幾次仲訓著埋 (明明未到訓覺時間) (睇下佢個招積樣) 剛好果日去左吉吉島 就將車仔同Pockit+比較下 Size差唔多  座位矮身少少 無Pockit +咁闊身 大家可以參考下 (因為滕滕訓左 我會帶定張被仔比佢遮一遮光) 依家去街市或者多人商場我都會推依架 (人群中穿插完全不成問題 笑) 收起都算細部 去迫小小餐廳都可以將車仔放係枱底 試過坐巴士放係腳邊都唔成問題 唔使下下扣係行李位 真係幾方便 特別坐小巴 終於唔使比人側目 如果去足全日想滕滕訓得舒服就推Graco 要注意係依類車必須雙手開收 所以寶寶識企定定會方便點 ( Gb Pockit 都係面對同一問題) ---------------------------------------------------------------------------------- 我認為性價比都幾高 唔使四百蚊人仔 穩定同舒適度都唔錯 當然不能夠同千八蚊車比較 但平平地都算夠用 都幾岩買黎嫲嫲婆婆去街市粗用或者需要輕便出國旅行用 (當然要不介意淘寶貨及不擔心中國製造) 不專業評分：3.5/5  ---------------------------------------------------------------------------------- 聯絡我們 - allaboutqq@gmail.com 有時間入黎面書比個Like我地啊 - 「育」滕滕 不定期都會出淘寶開箱及育兒分享 多謝收看