剛踏入兩步茶煲2，其實之前睇書話2.5歲先開始茶煲，不過個個小朋友都好獨特既!!! 無膽鬼一進入兩歲，唔知點解自動自覺唔洗點抱仲夠膽自己企電梯，我覺得好神奇，因為23個月29日佢仲要我抱死都唔肯行!!! 生日個日我同佢講你大個啦，連生日歌都識唱，大個仔叻叻豬啦!!第二日佢心情就好好，成日自己行，只係跑到攰就叫我抱下!!!但我真係輕鬆左好多! 我一直都唔擔心佢自己走唻走去，因為佢唔敢落電梯，佢勁驚，一定要抱!但突然佢就唔驚啦，反而我就開始驚LU......好彩暫時電梯同過馬路都會主動拖我!!!我知道好多小朋友會成日唔比拖又會訓馬路令父母好頭痛，所以媽媽既耐性真係非常受到挑戰!!睇左幾本書，近排開始睇"小孩只是卡住了"，我覺得講得好好!好多事都有原因，但小朋友唔識表達只好用訓地，喊，打人去表達，呢樣真係令大人好辛苦!點解小朋友無啦啦要訓係地下抗議呢?我仔都會，一唔想走唔想返屋企佢都會訓係地下，我唔會行開，我會等，唔會抱佢唔會鬧佢，但我會話佢知唔起身會有蟲會有人唔小心踩到佢，有時好WORK，有時佢會堅持!!有次佢訓係行人路中心，好多人行唻行去，我個下真係著晒火，我同佢講咁多人行唻行去你訓係路中心，你要知道有幾危險，差不多兩歲既小朋友其實已經知道咩叫痛，所以我最後抱佢係側邊由佢訓地喊下，喊左5分鐘佢見我無咩反應，佢就收聲同我講仲想玩!!!我地做父母，每一個難關都要拆解，每一次挑戰都好唔同，但我覺得妥協就會輸!!!小朋友好醒目，佢喊你抱佢，你就輸!!!無錯，有時會好無面，有時又會有3姑6婆幫口叫我唔好咁刻薄，但小朋友係我既，我想點教就點教!!!佢地可以幫口可以抱佢呵佢，但我唔會!!!因為對成日既係我!!!!我覺得識行識走既小朋友已經可以學堅強學獨立，所以我先講一抱就輸呢件事!未識行未識走佢一喊我都係會抱佢既....係呀，個時好多人同我講我死緊，小朋友好醒，見你會抱佢，佢就會成日要你抱架啦!!!半歲既都已經進化晒架啦!!!!!個時聽最多人講既就係:「你個仔成日喊架，行開一陣都唔得係要抱.....一定係你寵壞啦！」可能係啦，但半歲前建立安全感我覺得都幾重要既！不過最衰左個頭，之後要改就要慢慢架啦！太急佢又適應唔到好慘！ 我仔好鐘意作對，你話1佢話2，我叫佢抹手佢就話唔抹手，我叫佢飲水佢就偏唔飲，叫佢放底啲野佢就死唔放!!!好似好難搞，但其實小朋友都只係想同你玩!!一日12小時都同你玩，同你作對!!我一早有心理準備，因為我老公成日話我同佢作對，咁我個仔同我作對都正常既，遺傳呀嘛....不過其實所有事都放鬆啲，對大人小朋友都會輕鬆好多！我好少迫我仔做佢唔鍾意既野，我唔知啱唔啱始終佢叫細，但佢一出世就有佢既人生，佢有權利既....所以到依家兩歲帶佢買餸佢已經識講想食咩！本身以為佢係咪真係知呀，佢又真係揀完會食，仲日日唔同！我都幾驚訝，對呢個無主見既呀媽真係好大幫助！ 每次一受到挑戰我就會諗計搞掂佢，以前既我一遇到問題就會逃避，唔會諗解決辦法！但生完之後就無得唔解決啦！近排我好鍾意吱到佢笑到卡卡聲，我仔好怕吱，我一話吱佢就會乖乖聽話，都幾神奇！明明應該覺得好玩但反而會成為一個「stop」！有時我老公都會問佢會唔會笑到斷氣架？我都驚架，不過與期要佢喊到七彩，不如等佢笑到癲？都係要時間解決！反而吱佢仲快投降，每日都會有好多歡笑係屋企幾好呀！ 當然啦，好多事都要自己衡量既，少少事就可以吱下姐，太過火都要鬧下既！呢個年代唔主張打，所以我都唔打啦，但道理我唔覺得我仔聽得明，所以睇書真係好好好重要！每一本繪本都可以自由發揮講下道理比小朋友聽，佢唔會即時知你講咩，但其實佢地已經記住左架啦！ 生完小朋友就覺得以前返工既挑戰都唔係挑戰，教小朋友先真正係一種學問！佢學習既同時我都學習緊.....