唔發火當我病媽 https://www.facebook.com/angrymami/ 呢排轉天氣，身邊會有小朋友感冒/ 發燒 / 咳，但偏偏好多呀媽就會因為自己要番工無人湊做理由照帶個小朋友番學。 小朋友仲細，衛生常識無咁好，唔識得洗手洗手洗手，亦唔識得因為自己病唔好周圍摸，先唔好話佢傳唔傳染隔離同學仔，自己去到一個咁多小朋友既地方，都真係好易交叉感染，病多幾錢重 但你番左學，對小朋友又唔好，去到幼稚園呢個細菌溫床，你又病佢又病，結果一齊病，連本身健健康康小朋友都病埋。 重點係，我地係無得避 (唉) 既然係咁，點解仲要帶自己小朋友番學？ 因為佢地要番工。 其實又唔怪得哂佢地，香港地既老細對你有小朋友呢件事係完全零體諒，我話知你生幾多個，總之唔好影響到你做野，試過有個朋友同我講，佢坐緊月個上司打電話黎同佢講「你坐月都無野做架啦，番黎番工啦！」 所以好多家長，見到小朋友只係「病病地」，表面無咩野，就照帶番學，唔係點？屋企又無人照顧，唔通請假？ 明既，作為同為打工仔既我，係好明白既，但明又唔表示你岩！你明知個細路唔舒服，番到去都係無精神又要同其他小朋友交叉感染，就唔應該帶佢番學！小朋友病最辛苦莫過於大人(特別係呀媽)，感冒初起，就算唔請假都起碼帶番個口罩，真係嚴重就更加應該係屋企休息，我知你份工辛苦，知你要請假好煩，咁係咪你唔駛煩就要煩到其他呀媽先？係咪傳染左俾人你個仔就會好番先？ 事實係，多數病病地既細路去完學校番黎只會更病，你一個唔得閒就照帶佢番學，其實只會令個小朋友病得更辛苦 做人呀媽辛苦，明白，大家都明。不過將心比已，大家都係為仔女著想，今次爆腸胃炎，下次又唔知爆D咩病毒，會嚇親呀媽架。