天氣越嚟越凍，又開始多人「he he ham ham」，喉乾聲沙、痰多甚至咳過不停喇！我哋啱啱先大病初瘉，早兩個星期咳到死死下，都係我唔好啦！傳染埋畀晴朗爸爸，好彩晴朗冇受感染咋！中醫、西醫睇過都未好番，結果又要出動燉橙、白蘿蔔蜂蜜水同埋川貝冰糖燉雪梨呢幾條偏方。趁煲開，就同大家分享埋後者啦！對止咳化痰一樣好有功效！ 材料： 川貝(磨粉) 1兩 鴨咀雪梨 3個 紅蘋果 1個 無花果 3粒 冰糖 適量 做法： 1. 雪梨及蘋果洗淨、去皮、去核及切件 2. 據聞雪梨皮有潤肺生津、止咳化痰嘅功效，所以所有果皮都唔好掉呀！放在一旁備用 3. 無花果洗淨後，每粒切開一分為二 4. 用熱水將川貝粉攪勻至沒有粉粒 5. 將所有材料放晒落燉盅內 6. 加入凍滾水，蓋上燉盅蓋 7. 燉4小時 由於時間關係，4小時好快過去~ ^o^ 新鮮熱辣嘅川貝冰糖燉雪梨出爐喇！*o* 朗朗特別要求加果肉，所以最特別係佢啦！ 我都鍾意食埋果肉，但想留肚飲多碗，所以淨飲ok喇！ 晴朗真係好鍾意呢款燉品，每次都會主動幫我睇住個燉盅幾時燉好，提我攞出嚟畀佢哋飲~ ^^''' 佢哋當呢個係甜品咁食，特別係雪梨同蘋果都燉到軟綿綿，好好味！ 有時未必一定係有人唔舒服，間中燉嚟食下對身體都有益㗎！ 一家人邊嘆燉品邊說笑，我哋嘅生活就係咁簡單．快樂~ ^^ 川貝嘅鎮咳、去痰功效非常好，所以被喻為天然止咳劑。每當屋企有人連續咳咗幾日，就會諗起川貝冰糖燉雪梨呢個良方喇！我鍾意加埋無花果，因為佢有清利咽喉、清痰化滯嘅功效。大家如果有興趣燉嘅話，買川貝時記得叫老闆磨埋粉。有次我就係忘記咗！結果響廚房用攪拌機攪到一糰糟呀！有朋友話唔落冰糖已經夠甜，亦有朋友話落咗冰糖會惹痰。大家可以按個人喜好選擇落唔落，我就喜歡甜，所以落少少都冇壞，飲咗一樣覺得有止咳化痰功效呀！要注意嘅係加水落燉盅內要係煲過嘅水，唔好加水喉水。而飲剩咗嘅話，可以放入雪櫃，下次飲用前再翻熱。但雪梨同蘋果肉食剩唔好放過夜，聽講放到第二日會變酸，影響埋啲湯汁就唔好啦！好飲又有益，大家都不妨燉嚟同小朋友一齊品嚐下。祝各位都身體健康、幸福快樂！ 其他化痰止咳良方： 燉橙 | 白蘿蔔蜂蜜水 FIND US on:         BLOGs:   CONTACT US: