襯自己仲記得,要快啲記錄低 當屋企人知道女皇存在後,62已經決定好女皇要係私家醫院出世. 醫生係62學生推薦比佢既 : 岑德強醫生 女皇既預產期係2017年10月3日, 係2017年10月2日中午12點幾,媽媽我就見紅喇,見到呢個情況緊係沖個靚涼洗個靚頭,再落街食餐飽先慢慢入院啦XD (Ps:記得帶齊醫生信,身分證先出門口) 到咗醫院就直上B座2樓收症房由姑娘分流,再幫你辦理入院手續. 姑娘會問你好多問題,etc:BB出世餵全人奶定配方奶?做唔做聽力測試,嬰兒代謝檢查等等..跟住清楚明白晒就會叫你簽文件,同你量血壓,度高磅重,驗小便,陰道檢查,剃毛毛及灌腸. 攪掂以上程序姑娘會比埋個走佬袋你帶你去床位,好好彩姑娘比左個窗口位我,我住6人房,基本上頭2日都係得3-4人,第3日仲淨返自己一個,獨佔左間6人房,哈哈！ 換好衫後由姨姨帶到另一間房check胎心同抽血,呢到爸爸都可以陪住.Check完就返到自己床直到夜晚岑醫生黎檢查.,檢查完話一度都未開喎,睇埋聽日情況點,如果女皇仲未有意慾出黎就要催生,因為孕期間試過兩次出血. 因為無咩野可以做,爸爸陪到我夠鐘就走喇.  點知一過左12點,我就覺得有啲不規律既m痛,因為都唔算好痛所以決定訓覺先.到朝早7點幾岑醫生黎幫我檢查原來已經開左2度喇,之後食埋早餐姑娘就帶左我同爸爸去生產房,個陣既m痛已經開始有規律咁痛,姑娘教我坐fitball放鬆,到10點再檢查個陣仲穿埋水,之後開始黎料,痛到真係叫救命！ 姑娘比左笑氣我,仲即時教爸爸幫我按摩等我無咁痛.但已經痛到不能忍受,而我又錯過左打無痛既時間,只能大大力咁聞笑氣幫自己舒緩下,我記得我一大叫既時候姑娘就叫我唔好叫,唔好用力（大佬我做到就唔叫啦）,又係咁話見到頭髮喇,但呢句我聽左好多次,心諗你係咪呃緊我個人聞笑氣聞到wingwing地飄飄下既時候,就比姑娘拎走左支笑氣同我講生得喇叫我用力,幾經辛苦到中午12點37分,女皇出世了,重6磅6,爸爸都幫囡囡剪左臍帶! 姑娘幫我換好衫影埋第一張一家三口既相之後就推我返床,休息左8小時後先可以落床嫁,係未落得床既時間,會由姑娘推女皇比我埋身餵哺,如果你揀全人奶,姑娘會問你拎電話號碼,只要BB喊餓佢就會打電話通知叫你去餵哺室!到左第三日姑娘同我講女皇小便片唔夠問我會唔會補奶粉,等我又可以訓覺好既,因為媽媽都需要好好休息先有奶!所以我都同意左,好多奶粉牌子都有得揀.我覺得奶粉隻隻都差無幾,所以揀左能恩比女皇.我既最後一晚好爽咁訓左8個鐘 到走個日姑娘比左女皇張針卡,出院紀錄,嬰兒相簿我地,同講解下點拎出世紙,打電話到健康院約打針等等...如果你餵人奶,姑娘會定時打比你問下你既情況睇下有無咩幫你解答! 入院個條手帶記得唔好扔,相簿第一頁就係比你放手帶 ✨小資訊✨ 探訪產婦時間：7:30-22:00 探訪嬰兒時間：11:00-20:00 （只可以隔住玻璃） 另外有父母親親寶寶時光：17:30-20:00 （爸爸可以抱抱BB喇） 走佬袋(順產)有咩: 產婦衛生巾2包,床墊2張,網褲2條,清潔瓶1個,女性潔膚液1支.1個有蓋膠杯,1個袋仔比你隨身攜帶放下電話同1把鎖比你鎖櫃(穩陣起見我帶定多1包衛生巾&網褲,2張床墊) ———————————————————————————————————— 想睇多啲靚相,知道我地更多動態,可以Like我地FB同Follow IG.. FB 茯柃成長日記 : https://m.facebook.com/veronicadiary IG Follow : nica_chung YouTube：Veronica Diary