11月上旬，朝瞳因為腸胃炎發燒拉肚子。腸胃炎經歷過一次，本來非嚴重事，但今次整日高燒至40度，係半夜我再受唔起驚嚇，決定去公立急症。 本來都唔需要留院，醫生輕描淡寫表示發燒好平常，但為母強調怕高燒，所以都堅持留院，結果上演左「兩日一夜相依為命公立醫院生存記 」。 Touchwood 所住嘅公立醫院都好正常，入院嘅小朋友一定要有位成人24小時陪伴，而係傳染病高峰期，醫院就規定不準自出自入，但家人係可以送物資同限定時間探病。公立嘅環境好壞真係見仁見智...   嘈嗎？呢方面我相信公私立都有機會的，隔離床嘅聲音你永遠控制唔好，除非負擔得起單人房 好食嗎？只可以話價錢同質量成正比，私立多啲選擇付出係多啲，公立就係正常不過嘅飯菜，即使醫院有飯食，我相信長老都唔會放心一定送飯送湯 瞓唔瞓到？同房確實有年紀較細嘅幼兒，半夜飲奶的確會嘈，但朝瞳係無食藥嘅環境下都可以一覺天光，所以都好視乎自己情況。 兩日一夜係間房裡面，唔難挨就呃你嘅。除咗小朋友自身唔舒服、會嘈會扭，亦會覺得悶，好在朝瞳媽早有準備，經常隨身帶書、筆、紙，仲帶埋播音機，係許可嘅情況聽音樂。慶幸呀女都係個女漢子，哭鬧唔算多、仲開開心心玩到，姑娘都問「點解你咁好笑容？」，都算係一個經歷。 最重點，兩日一夜驗埋大便、畀埋藥出院都唔過$300大元，好少少嘅私家門診都已經貴過佢。公立醫院嘅環境與價錢成正比，但對小朋友嘅醫療支援都做足嘅。同樣case入私家醫院都至少幾千銀吧..... 有保險Back Up當然可以住好啲，不過一年幾次高燒都可能入院就怕長計。如果要抽驗或額外醫療支援，相信私家唔止幾千銀吧... 文章絕對不是宣傳住咩醫院平，只係一次經驗分享。當然希望每位小朋友健健康康，父母亦唔需要擔心。但真係打到嚟，至少可以參考一下... 祝孩子們身體健康 喜歡嘅朋友，可以 Follow  朝瞳氏の日常  睇更多日常放送。