「放低，等我嚟！」、「得得得，唔好掂！」、「唔係咁整嫁！」湊仔湊女每日總會講幾次或幾十次。特別係忙於家頭細務、趕時間出門等等，恨不得呀仔呀女坐定定！ 但我成日問自己，唔畀佢做，咁佢點會學識？朝瞳呀婆係位持家有道、凡事要求井井有條嘅專制呀媽。細個時，甚少畀我去公園玩，結果我十歲攀梯都好屎，最慘係將近廿歲先識踩單車。到大個，提出幫手煮飯，佢都要係旁邊”指點”:「傻女，要咁對切呀！咁都唔識！」主題到喇：「你都冇教過、畀我試過，點會識？」我心成日咁諗。 終於到咗自己教女， 我打從心底希望朝瞳會自己試下做！快將三歲人仔，係我控制到嘅情況下盡可能都自己食飯（成隻雞脾、成條菜咁食）、自己去廁所、自己著衫著鞋，就算中途會錯漏百出，我都同自己講「佢應該要自己做到的！」。 希望細路學識26個字母，讀閃卡愈多愈好，但到頭來生活自理上無機會畀小朋友自己做，好似有啲本末倒置。 其實我最想講：「呀女，你自己做啦！」 喜歡嘅朋友，可以 Follow  朝瞳氏の日常  睇更多日常放送。