今日已經係生完BB一個星期有多，對於生BB既過程仲係歷歷在目，感受好深刻！所以都要快d記錄底，第日第囡囡大個左都可以同佢分享返！ 今次生BB由宮縮到穿羊水都有成30－40個鐘，係2月21號晏就5點個陣發現個肚隱隱作痛，一開始以為係平時既假宮縮，但發現佢係Keep住有規率性地痛，個刻即刻同老公備定案，但我無即刻入醫院，因為都只係15分鐘左右痛一次，所以我選擇留係屋企觀察多陣，我怕去到醫院會「被退貨」。去到夜晚都係訓得唔好，Keep住不停痛醒。去到22號朝早，仲要密到每5分鍾痛一次，即刻沖左個涼洗頭，仲去埋太興食左個早餐，就同老公搭的士去醫院。 去到廣華就去急症室辦入院手續，上左「候產房」觀察，姑娘會幫用部機觀察BB既心跳。去到醫院，個種痛就開始疏左，變到8-10分鐘痛一次。係候產科電話都無得玩，時間過得好慢好慢，但都可以出下去同老公傾下計，但個種係愈黎愈強烈，有少少似M痛、肚痛既感覺，每次維持40秒至1分鐘。個段期間，候產房既姑娘都好好陪下我傾計，但都話我未到最痛，要再痛d先得，個宮頸已經軟左。期間有醫生黎睇我既情況，係一個不知情既情況下，醫生伸左幾隻手指入陰道，但完全無講到會做咩，淨係話：有機會會見紅流血，唔洗驚。呢一點真係令我有少少唔開心，其實可以講一講，等我有少少心理準備⋯⋯ 一直到夜晚都未去到5分鐘痛一次，佢地就轉左我上去產科個到等，話穿羊水或者痛到5分鐘一次先再轉返我落去，一轉左我上去3個鐘後，我就開始痛多左，去到凌晨2點痛到5分鐘一次，但同左姑娘講都無咩點理我，想訓訓唔到，訓著5分鐘就醒一次，個陣個感受好難受，個腦不停諗，早知揀開刀啦、好想有個人陪下自己，之後d眼淚不停咁流，已經唔係痛到喊，係個種孤單既感覺令我覺得好無助好寂莫。 去到23號凌晨5點真係頂唔順就禁鐘叫姑娘黎，姑娘幫我Check話已經開左3度，我個刻真係好開心，好怕痛左咁耐會係一度都無開。心入諗即刻多謝個囡囡既努力。轉返去「候產房」之後，一痛真係忍唔住係咁叫，但因為怕樣衰，只係好細聲咁叫。姑娘就話一痛就鼻吸口呼，唔好叫同忍，如果唔係個宮頸會軟得唔夠好。不過講就易做就難，我用左好大既理性控制自己，都唔係下下做到。去到7點，醫生黎幫我人工穿水，Feel到好多暖水流左出黎，個肚就愈黎愈痛，真係有一種想去便便既應覺，我既叫聲當然都愈黎愈黎勁，一痛我就好想去便便，姑娘又係話：唔準去便便啊，呼氣呼氣。 痛左一個鐘左右，係我好迷糊期間，聽到姑娘話：見到喇。就好快咁推左我去產房。一開始以為係拍戲個d手術室既樣，好暗有盞燈係頭頂，但原來係好光猛，仲要有「家的感覺」。入到去用左3下力，Feel到有d野出左黎，再聽到BB喊我先知「原來生左喇！！」。比想像中輕鬆，連醫生都話我好快，可惜老公趕唔切黎睇住我生，只係係縫線個陣入黎陪我（我覺得縫線仲痛過生）同BB做肌膚接觸先真係覺得自己真係要做媽媽喇！見到BB個刻，真係眼濕濕，好感恩佢錫住我，好快咁出左黎，仲要眼仔碌碌、玩下口水，真係好可愛！ 到依加回望返，所謂既十級痛都無想像中咁痛，可能係因為母愛，只要BB順順利利、平平安安咁出世，已經足夠Cover返個種痛。順產並唔可怕，人生流流長，我只係用我成世人既小小時間去經歷呢一種痛，係一種好值得記念既痛。而且人一世物一世，應該咩都要試下，令我既生B過程好似完整左。 其實回望返，我覺得自己生既過程同上奶時間都好快，可能同平時運動上、飲食上既習慣有關，下一次再同大家分享啦！ 留意我Facebook同IG會更快知道我既Update架！ Facebook：https://www.facebook.com/90sMummy/ Instagram: https://www.instagram.com/minarainlo/