岩岩先發現，原來有地方賣有配料既希臘乳酪，唔洗係屋企自己配，方便快捷d，有時買生果返又唔係一次食得哂！ 哈哈，未有牛雜仔仔之前我真係無留意自己食既係咪乳酪，依家知道咩先係有 “營”既 “真”乳酪！咁順便分享一下咩係乳酪啦！ 乳酪大部分人都認為夠健康，低脂又對腸道好，怕肥同減肥既人都會食。 孕媽媽就不再話下，懷孕期間唔食得雪糕等既生冷野，醫生建議一星期可食兩至三杯乳酪，仲唔用乳酪代替雪糕咩。 但平時買到既乳酪又係咩真係你諗既咁健康呢？係度同咁多位交流一下先！ 自從我地開始注重健康，要買到乳酪真係超方便，由便利店到超市都有得買，但你要食到真係健康既乳酪就要去到超市先有，仲唔係間間都有架！你會問，唔係喎，7仔同OK都有啦，邊有咁難買呀！係，但係個d只係扮乳酪，唔係真係乳酪黎架！ 市面上最見到既有乳酪Yogurt、希臘式乳酪Greek Style Yogurt同希臘乳酪Greek Yogurt 呢幾款，依家就帶大家交流一下佢地既分別！ 三款既分別係邊度？ 乳酪Yogurt 多數用低脂牛奶製成，有d會用「基因改造」牛奶或加水，鈣含量相對地低。 希臘式乳酪Greek Style Yogurt 通常用低脂牛奶，再加入其他牛奶元素、澱粉質或糖，模仿希臘乳酪質地。澱粉質同糖含量相對較高，但冇益生菌。 希臘乳酪Greek Yogurt 係用真正牛奶發酵，蛋白質同鈣質含量相對最高，鈉含量最低。 味道同口感都有分別架！ 乳酪同希臘式乳酪口味比較多，又有分高鈣低脂等，就算原味都帶甜，且較細滑，較易入口。 希臘乳酪多數只有原味，且味道較酸及濃郁且杰身不細滑，一小杯都飽。   我呢會咁整乳酪， 一大筒既希臘乳酪可以整到5至6杯。 藍莓士多啤梨脆脆乳酪 希臘乳酪1杯 蜂蜜適量 藍莓1/3盒 士多啤梨4粒 麥片適量 先加入大半杯乳酪，加入適量藍莓、士多啤梨、蜂蜜，再加餘下既乳酪，最後加入麥片同餘下既材料，蜂蜜淋面。放入雪櫃雪30分鐘，食得。   牛油果士多啤梨乳酪奶昔 希臘乳酪1/2杯 低脂高鈣牛奶1/2杯 牛油果半個 蜂蜜適當 士多啤梨4至5粒 牛油果及士多啤梨切粒，放入冰箱30分鐘後備用，於攪拌機加入希臘乳酪，低脂高鈣牛奶，冰好既牛油果及士多啤梨粒，最後加入蜂蜜，開機攪拌，奶昔完成！