生咗仔之後都真係無乜幾可煮飯，因為已經完全唔想再郁，呢個相信係不少媽媽都有嘅感受！因為湊仔係史無前例咁攰嘅，比起以前打稿打到半夜4點再7點起身繼續打更攰。（好大可能同老咗有關嘅又...） 不過出街食得多，已經食到唔知再食咩好，所以趁放假就整個容易又好食嘅韓式部隊鍋。呢部韓國辣拉麵年糕 一田百貨 (YATA) - official Page有售，次次都食到我哋兩公婆Lam Lam脷。只要買齊想食配料就即成為美味部隊鍋。 部隊鍋配料其實都不外乎係腸、餐肉、金菇、豆腐呢啲，我哋額外再買咗牛肉片、丸等等。 製作方法非常簡單，先將麵同年糕用水沖洗，然後將辣醬加入鍋(兩包辣醬只放入1.5包驚太辣)，注入清水量比起包裝說明的多(都係驚辣)。先煮年糕至三分之二熟，再將所有配菜放入，到7788時再放入麵同易熟嘅餸，蓋好鍋等到滾就可以。 煮熟晒就上枱食得，Bear生夫婦都食得好開心，食到肚滿腸肥添！ 丸bb就太細個未食得。我都其實整咗個美味菜飯同蒸水蛋佢食，不過呢個厭菜寶寶真係一食菜就即吐(唔知點解咁醒目)，又唔喜愛水蛋質地，結果又食得少量白飯 睇嚟媽媽之後都要諗多啲變化畀佢先得！ 想睇到更多BearYuen生活同丸BB嘅資訊：https://www.facebook.com/BearYuenLife/