相信對於好多媽媽（及長輩）黎講，坐月係生完bb既頭等大事。但如果可以比我再黎一次，我一定會用！自！己！方！法！坐！ 1. 關於沖涼洗頭顧傷口 果醬媽係順產，但有剪，所以生完除左要恢復，仲要顧傷口（但醫生姑娘都唔會教點做）。我生b個陣係夏天（30幾度呀大佬！生完仲有身汗呢！）但生完之後，家中長輩堅持唔比沖涼洗頭，只準抹身，而且話至少堅持12朝（殺左我啦！）。由於係第一胎，加上無經驗（雖然我完全唔認同呢種守舊既方法，但為免多事，我都係忍住聽話），所以我忍忍忍忍忍！但咁熱而又無得沖涼咁耐係一件事分痛苦既事，結果我每次見到盤抹身既水都忍唔住喊，同時發現傷口好得特別慢，所以忍左12日我終於忍無可忍，自此日日沖涼洗頭（當然要即時抹乾同吹頭），人生先覺得有返d希望。 而事實上醫院都鼓勵媽媽每日沖涼，尤其餵人奶既媽媽，保持潔淨衛生其實好緊要。而係無涼沖既日子，我每日都會消毒傷口，以免發炎。   ２. 關於飲食 相信每個媽媽或者長輩對坐月既飲食都十分注重，但事實上係我並唔係好buy戒口呢一套，相反我覺得懷胎十月＋生b咁辛苦，要補充營養就應該咩都食（偏偏長輩就話食薑食菜食瓜先好，仲要黎黎去去都係個幾款），真係食到我崩潰。加上懷胎時我都無特別戒口（除生野，咖啡，雪糕外）基本想食乜就食乜，有時想食薯片，西瓜，飲奶茶，咪照食囉，最緊要唔好過量。再睇下台灣d月子中心既飲食安排，我就好肯定如果要黎一次（生第二胎？），我的月子一定自己坐！ 3. 關於心情 有人可能會講：忍都係都係忍一個月啫，算啦！No! No! No! 要知道生產完既媽媽，除咗身體之外，其實個人情緒都好緊要，尤其是係呢d荷爾蒙都調節緊既時候，所以忍並不是最好既方法！事實上在坐月呢段時間，係我有b咁耐以黎，食得最少，過得最唔開心既一段時間，中間仲覺得自己產後抑鬱（隨時隨地都想喊），好在老公係企係我呢一邊，佢會幫手製造機會比我放肆，先至好點。所以，如果有黎一次，我一定會畀自己坐到個開心的月子！