生bb之前已經有定心理準備生同湊仔都唔容易，不過實際經歷一次先明白當中辛酸。 1.24小時on-call冇得抖 做媽咪就係要24小時on call , 小跳豆一喊就要照顧佢，無分晝夜。加埋小跳豆好鍾意人抱住周圍行，真係少啲心力都唔得。我未生之前瞓覺瞓足8至10個鐘先夠，依家就完全冇可能。 2.冇錢同私人時間 全天候湊仔，冇收入，唔敢亂買嘢。想進修，都冇時間同錢。難得得閒都會拎黎睇湊仔啲嘢。 3.事業上擠後 同齡朋友喺事業上搏殺緊，我就係屋企湊仔。我亦都會擔心遲啲等BB大啲之後出返黎做野會冇人請。 4.朋友嘅不理解 朋友唔了解湊仔，我會開始覺得佢地唔啱Channel。我有時會有種莫名嘅孤獨感。 不過，凡事都有兩面。有失都會有得。 1. 24小時陪著bb見證成長 雖然辛苦啲，但係小跳豆嘅笑容係我嘅原動力。全職媽媽可以見證著BB成長。見著小跳豆成長嘅每一步，我都覺得好感動。 2.更珍惜善用時間同錢 人人都係得24小時，好睇你點樣分配好時間。我以前做嘢好慢，而家都改善咗，快左。錢都係一樣，唔識善用就多多都唔夠。 3.有心唔怕遲 我有個新加坡朋友，佢曾經服過兵役。佢都會有種事業比同齡朋友擠後嘅感覺。不過，有啲經歷其實好難得。湊仔都一樣。返工，可以遲啲努力再catch up返。BB成長過咗就會冇。 4.更有同理心 感受過不被理解之後，我更加明白有同理心，代入其他人感受嘅重要性。 係照顧小跳豆嘅時候，難免有好攰嘅時候。不過，當中我更加了解自己，亦都成長左好多。多謝上天送咗小跳豆呢份禮物比我，令我人生不再一樣。 謝謝閱畢！ 歡迎聯絡: jumpybeanmum@gmail.com Facebook page: 小跳豆媽育兒記 Instagram: jumpybeanmum Blogs 腳印 靚太club,My BB.com, Mamibuy