康妮媽兩胎懷孕期間都只是重了大概25膀，唔算好多。可能因為我本身體積都比較細，身高唔夠160CM，加上哥哥同妹妹兩個都唔係重磅B。我驚脂肪積聚得愈耐就愈難減，所以產後我已經積極瘦身，半年內體重已回復至100磅，腰圍回復至24吋。點解咁努力？除左唔想做肥師奶，我覺得呢個係我對自己既要求！但係我絕無節食，亦無瘋狂做運動，更無花費幾萬大元去纖體美容中心做機。我只係用左以下方法，話多唔多，話少唔少，但絕對唔係什麼地獄式減肥法，而且仲算係幾舒服既添！   均衡飲食 呢個世界無不勞而獲，呢樣係must-do item。不過唔係節食，係均衡飲食！生bb對身體損耗已經好大，點可以節食，搞壞身體仲弊。加上我頭半年係餵母乳，新陳代謝比較快，有入有出，食野根本唔會肥，反而需要好多營養。當然唔係暴飲暴食，要食得健康食得精，多菜少肉少澱粉，每餐只食到七分飽，最好就做到少食多餐。P.S. 情況許可，鼓勵各位媽咪餵母乳，因為除左對BB好，對媽媽都好，而且加速媽媽新陳代謝，大大幫助減磅！   適量運動 又係無得走雞既item。不過除左運動，我仲用好多時間拉筋，唔知大家知唔知，其實拉筋對身體有好多好處。可以通經絡排毒，可以加速新陳代謝去水腫，同時可以柔軟身體，令身型更靚。大家不妨試下，做媽媽壓力好大，keep住拉筋，亦有助減壓，心情都舒暢D!講返運動，因為工作同湊小朋友好忙，我主力係做一D可以係屋企做既運動。通常我會襯佢地瞓左教，就做十五至三十分鐘運動。至於點拉筋同做咩運動？上YouTube 一search其實有好多選擇，我好多時係跟韓國既鄭多燕跳健康舞或者做一d收緊肌肉既瑜珈動作。無錯！就係咁簡單！又方便又省時間又免費又有效！各位媽咪無藉口唔做運動啦掛！！！不過提提大家要小心整傷條腰，生完BB條腰比較弱，做運動時小心整親。尤其好多收腹運動會用到腰力，大家要小心扭傷，記得量力而為！   全身通淋巴 未懷孕前，我間中都會去做全身通淋巴。所以係產後兩個月開始我就去通淋巴，當時我自備了薑油去，亦有做熱石同薑包。我感覺通完淋巴成個人會暢通d，除左可以排毒同去水腫，仲可以驅風添。另外一個原因係由於我係剖腹產，唔可以太快開始做運動，而且産後太快開始運動好容易會傷到腰部，所以我選擇左先透過通淋巴幫我排毒同去水腫！   DIY束腹 宜家見到市面上有產後紮腹既服務，我當時反而無留意到。但係我當時上網搜集資料時知道台灣一位知名女星産後係用紗布束腹帶收身，我自己將信息過濾後都幾認同呢套做法，加上我知道其實產後醫生都會叫我地用束腹帶去hold 住開刀個傷口以減輕痛楚，而且束腹又可以幫助子宮收縮同減輕腰部壓力，所以我就試下。另外，我個人好唔中意產後個肚皮鬆左個種感覺，呢種感覺係真係生過bb既媽咪先會明白，我覺得束腹時可以令我感覺好好多。我係用圖入面呢款束腹帶，我中意佢有彈性同夠長，而且質地相對較薄，咁就唔會焗住皮膚。方法係用束腹帶從臀部接近腰既位置開始束至上腹，小腹位置較緊，肚臍位置中等，上腹較鬆。咁就可以幫助子宮收縮，又唔會影響内臟運作，同時減輕腹部皮膚鬆弛同達至收腹效果！   穿著修身衣 我一坐完月第一件事就係衝去買修身衣著。我買既係一款頗出名既日本牌子，度身訂造，一條修腰褲仔加埋一件修身衣就差不多一萬，其實我個人覺得價錢幾貴，係我產後修身既最貴一個項目！但真係著得好舒服，好多平價修身衣會箍到好緊，不但唔舒服，對身體都唔好。著修身衣既原因係我希望佢可以引導我懷孕期累積既脂肪去返岩既位置。有無聽過著岩胸圍胸部升兩級呢個例子？同樣道理，有時你未必真係肥，可能只係脂肪去錯位。著修身衣可以輕鬆令身型靚返！   我產後大概就係用左以上幾個方法修身，希望可以俾大家作參考。不過最緊要係選擇適合自己既方法，同埋記得要量力而為！最後附上幾個小tips俾大家！   切忌心急係短時間內減磅，容易導致皮膚鬆弛 做運動時小心腰部，產婦腰部較弱 唔好節食，會減低新陳代謝，對身體亦唔好 Follow Me Facebook : conniemamaaa IG : @conniemamaaa