果醬媽本身好鍾意小朋友，生B前亦覺得自己好ready，所以我地都好開心咁迎接我地既第一個寶寶。當然，有好多野都係呀B出左黎先知「乜原來係咁架」，好彩而家BB愈來愈大，好多野都已經上左手，先無再咁緊張！而家諗返起，其實當BB在媽媽肚入面出左黎個一刻，生活的轉變也默默開始，除左要坐月，媽媽亦開始無得想去邊就去邊、想訓就訓、想做乜就做乜。0-3個月，BB岩岩出世要適應周圍既環境，呢個時候既佢好脆弱，必須好溫柔、好有耐性對待。呢個階段既BB訓得最多，每日都係食飽訓，每2-3個鐘醒，跟住換片、餵奶、掃風，之後又再訓。好彩既BB訓，媽媽可以跟住訓陣，唔係可能仲要做呢樣個樣。而以下係果醬媽作為新手媽媽係0-3個月護理初生BB既小小感想和分享。 1. 臍帶護理 BB出左世，每日都要沖涼，頭一個星期因為臍帶未甩，所以照顧起黎要特別小心。長老會話唔可以整BB肚臍，但姑娘會教沖完涼要印乾，再點用棉花棒清潔D分泌物，以免發炎。 2. 皮膚 BB岩岩接觸四周環境，面上可能會有油脂粒、紅點、粟米粒等，除非好嚴重或出現發炎／出血，D粒粒都會隨住BB大個(差唔多一個月)而慢慢消失。另外呀仔皮膚比較乾，一到乾燥的日子就好易痕同紅，呢個時候加濕機好重要！果醬B試過各個牌子，目前用Oilatum Bath Emollient(浸浴乳)同Cream Emollient(潤膚霜)最work，每個BB對每個牌子既反應唔同，各位爸爸媽媽真係要試過先知。 3. 頭泥 呀B出世後有小小頭泥，唔係太嚴重，我每日都會幫佢擦Baby oil於有頭泥既地方，到沖涼前一個鐘再擦一次，一星期左右就無晒，果醬媽用既係Cetaphil Baby Massage Oil，細細枝係講座贈品。 4. 手指甲 呢個係其中一樣令果醬媽好嬲既事！話說呀B唔肯帶手套，好多時會整甩，我見佢D指甲又長又尖，好驚佢整損自己，所以想幫佢剪指甲，但長老唔畀，結果呀B抓到塊面有兩條好深既血痕，最後我唔理三七廿一，幫佢剪左指甲。 5. 掃風與嘔奶 BB食完奶要掃風，就算佢訓左都要掃左先！有時BB食完奶嘔返一兩啖都正常，但我記得果醬B試過食太多，有一、兩次嘔奶，係連鼻都有奶噴出黎，嚇死果醬爸、果醬媽，所以要「定時定量」，而頭3個月加奶我都係半安半安咁加。 6. 身體不適 BB初頭有咩頭暈身㷫，爸爸媽媽都會好緊張！呀B兩個月大時就試過感冒，流晒鼻涕咁，周身唔舒服，最後我同左佢去左醫院，證實左係中左病毒要打抗生素。雖然我都同意無咩事都係唔好去醫院，但係BB仲細，今時唔同往日，有咩都係睇醫生穩陣，至少知道係咩原因唔舒服。呀B仲試過發燒，長老話唔緊要，最後check到係腸病毒。 雖然話係新手媽媽，但同BB日對夜對，無人夠你了解BB，所以媽媽們要信自己既判斷，有時做多好過做少！