嶠媽我有兩個小朋友，一個三歲三個月，另一個一歲。對於戒片，有好多講法，我在媽媽群組都聽唔少，上網都有睇過其他資料！我基本上聽返黎，自己搵嘅，所有方法都試過。先講我試過用咩方法幫芊嶠戒片，有失敗個案，最後都有成功個案！ +++++++++++++++++++ 個案一：在夏天的時間戒片，比厚身戒片底褲佢著，比個小朋友 poo poo 兜佢坐，教佢要痾就去 poo poo 兜坐係到痾。跟住佢好好笑，試過未除底褲仔，就坐係兜兜到痾左，結果，底褲仔濕左！X 失敗 X 【厚身戒片底褲仔好重要，因為佢同尿片唔同，佢可以吸到少量尿，如果太多，都係會漏架！所以用來訓練係最適合不過】 個案二：都是在夏天，由得佢唔著片，唔著底褲仔，唔著面褲，等佢通屋走，教佢想痾就去 poo poo 兜，結果，佢係咁坐係兜兜到，但又唔係痾，每次起身都話自己痾左，結果當然係冇痾啦！咁佢點痾呢？就係急到賴囉！我就拖地拖到傻，佢就偏偏唔係兜兜痾，急到賴為止！X 失敗 X ++++++++++++++++++++ 個案三：定時定候，每隔一小時就抱佢去廁所坐係坐廁到，要佢痾！我就每隔一小時抱佢去一次，問佢痾左未，佢話痾左，但其實冇痾！好啦！見佢不停飲水，好！再隔一小時，飲左咁多水，應該有得痾啦掛？點知又冇痾！但一行出廁所，唔洗一分鐘就賴左，唉！X 失敗 X 【每次帶佢去廁所，都會用埋BB廁所板，但都係坐得開心但唔痾】 ++++++++++++++++++ 個案四：放 poo poo 兜係廳，由得佢鐘意或者想就去坐，久而久之，我地每日都同佢講，要去 poo poo 就坐落去痾啦！好突然，有一日，佢又自動波除褲除片，仲痾左落兜兜到！仲大叫「呀！我痾左啦！」我去睇，又真係喎！即刻大讚佢叻女，再獎左零食比佢食！可能佢知道成功去到 poo poo 就會有零食食！每次想 poo poo，佢都會自動波除褲除片去兜兜痾！離戒片，成功左一大步，因為佢唔再係片片痾 poo poo，佢覺得up住辛苦，又會覺得自己坐到係到痾好叻！所以由得佢，之後每日都同佢講，其實佢係知道的！ ++++++++++++++++++ 芊嶠兩歲開始，我都已經慢慢嘗試幫佢戒片，試幾日唔得！我就過多兩個月再幫佢戒，因為小朋友唔迫得，千其唔好迫！因為迫得佢多，嚇怕左佢，驚左去廁所，咁就大獲了！芊嶠成功戒片係因為兩歲半個陣，參加左某間幼稚園嘅 Summer Day Camp，要連返兩星期，一星期五日，每日返3小時，只係小朋友返，爸媽冇得陪！ ++++++++++++++++++ 跟住有一日，芊嶠突然同嫲嫲講，想去vv，嫲嫲都係抱住佢得個講字帶佢去，點知佢又真係痾到！之後嫲嫲就索性幫佢著底褲仔，點知全日都成功冇賴濕喎！嫲嫲就同我講，所以我都想同佢試，經過左一星期嘅嘗試，結果日頭真係可以戒到片。 【成功戒片後，就可以幫小朋友著返普通棉質底褲仔】 ++++++++++++++++++ 芊嶠知道每次想痾都要同我講！但媽媽我神經質，半個鐘就會好緊張帶佢去廁所！但對佢黎講，其實唔好，會影響左佢想痾要講，因為我每次都緊張帶佢去痾，咁佢就會唔記得要痾、想痾要出聲！結果有一次，佢話想痾，我立刻帶佢去廁所，我抹緊廁所板時，佢已經除左褲仲賴濕埋添！我覺得對我黎講都係一個好教訓，因為佢戒左片，我一味只驚佢賴濕，就成日帶佢去廁所，避過左賴濕嘅情況，但就忽略左佢要有想痾時就出聲嘅重要性！經過哩一次經歷，我同芊嶠都成長左！因為係街到賴濕對佢黎講都係好難忘記嘅陰影！ 【話說有次婆婆帶芊嶠去廁所，點知痾濕左，媽媽我又冇帶芊嶠嘅褲比佢，心急之下就比左細佬條褲佢著住先，仲要好衰咁影左佢相】 ++++++++++++++++++ 講返點解返 Day Camp 會幫佢戒到片？因為係幼稚園，好多姐姐都已經戒左片，每次想痾都會同老師講，係3小時課堂中，老師仲會帶小朋友排隊去廁所，久而久之，芊嶠學左姐姐佢地自己去廁所。係小朋友廁所內，佢地對腳仔可以掂到地，自己坐係廁所都就痾到，自己拎廁紙，又可以自己沖廁，最後洗埋手出來，每樣野都自己做到，成個廁所嘅野都切合哂小朋友嘅高度，想戒唔到片都好難！ 【廁所入面分開一小格，有好幾格，同大人廁所一樣】 【最緊要係，小朋友對腳仔掂到地，好有安全感，自己去到，又好有成功感，廁紙只要抬頭就拎到】 【洗乾淨對手仔之後，吹手個部機都係就返小朋友高度而設架！自己洗手吹乾手】 ++++++++++++++++++ 但唔通每個小朋友都要返幼稚園先戒到片？咁又唔係，我想帶出一點係，如果你小朋友有表哥、表姐，或者大過佢地嘅好朋友，佢地都戒左片，不妨帶小朋友見佢地多啲，尤其大小朋友去廁所時，帶埋佢地入失去望下，比佢地知道，哦！原來要咁去廁所嘅！「急」要同爸爸媽媽講等等⋯有時爸媽講幾多都冇用，朋輩嘅影響力絕對不能忽視喔！ ++++++++++++++++++ 產品試用/活動邀請，歡迎聯絡：christytang329@gmail.com Facebook：【芊嶠與細佬·雞蛋仔】 Blog：https://kiumapatpat.blog/
