平時爸媽食壽司 小b得個"睇"字 難得媽媽今日有雅興 整壽司齊齊食 小b知道有壽司食，相當高興丫 陪媽媽去買三文魚，邊行邊講: 食壽司，食壽司 (不停loop，樓下姨姨同鄰居姐姐都知你今日食咩喇！) 最後小b當然好捧場啦！食完再添，清左9件 但阿媽只係食左4件咋 材料: 1. 青瓜仔 1/4條 x 2 2. 三文魚柳 1件 3. 蟹柳 2條 4. 蛋黃醬 少許 (可省略) 5. 米 1杯 6. 壽司紫菜 2片 7. 壽司醋 少許 (可省略) 做法: 1) 米洗淨，放入飯煲，加水至1杯米嘅水位，將三文魚洗淨，放於米上，蓋飯煲蓋，按煮飯制煲飯。 2) 青瓜仔與蟹柳一併以沸水燙灼，備用。 3) 蟹柳直切分半。 4) 飯煲好後，取出三文魚，用叉壓碎，加入蛋黃醬拌勻，備用。 5) 白飯待微暖時，加入壽司醋拌勻。 6) 取一片壽司紫菜放於保鮮紙上，紫菜面鋪上白飯 (注意紫菜邊位要留約1cm位置，不要鋪上白飯)。然後近中間位置鋪上一半份量的三文魚碎，再將1/4條青瓜及蟹柳放於三文魚碎上面，之後緊緊卷成壽司卷，握實定形，切件，撕去保鮮紙，完成。