上星期去咗一間小學同啲小四嘅學生分享理財知識，講咗一個有時連大人都會混淆嘅付款方法，就係西餅咭嘞。小編首先俾個任務佢哋，就係叫佢哋選擇究竟用唔用西餅咭去購買指定數目的西餅，咁當然要用西餅咭購物嘅時候，就會有好多附帶嘅使用條款，例如購物嘅時候西餅要以原價計算，如果購買西餅嘅價值少於西餅咭可兌換嘅價值，餘額係唔會有零錢找續嘅。 一開始啲學生小朋友都會覺得好困惑，會問我點解一件西餅會有原價同埋現金價之分呢，同埋佢哋會對於西餅咭嘅售價同埋西餅咭可兌換嘅價值，有啲混淆。其實呢個正正就係我想帶比佢哋嘅一種貼地嘅生活理財知識，要佢哋明白西餅咭其實同一般付款工具例如現金、八達通等有所唔同，因為使用西餅咭時會附帶好多其他付款工具沒有嘅使用條款及細則，西餅咭上所顯示的可兌換金額其實係要有條件地以原價兌換產品，我亦都叫小朋友諗下，如果餅店將西餅嘅售價提高，而手上仲有好多西餅咭嘅話，咁會點樣影響你可以買嘅西餅數量，等小朋友可以用另一個角度去認識乜嘢係通脹，同埋通脹對於佢哋日常生活中嘅實質影響。亦都可以知道西餅咭嘅價值其實會隨着時間同埋通脹去蠶食消費力，認識西餅咭並唔係儲錢嘅工具，而只係有限制、有條件嘅付款工具。當你下次同小朋友用到西餅咭或者超級市場禮券嘅時候，不妨向小朋友介紹購物券上嘅使用條款，同佢哋解釋要喺乜嘢情況之下先可以使用到購物券購物，培養小朋友對於身邊事物嘅觸覺，進一步增加理財知識。 更多其他文章：https://www.facebook.com/FinKAB/