相信如果個老公唔係李生咁富貴嘅太太們 都一定會攬實份工，然後「斷」絕所有飯局與娛樂，為的是慳得一蚊得一蚊，留比個B。 又或者全人奶嘅儘責媽媽們都會忍痛咁「捨」棄份工。同時間會一次過「離」棄一班唔太好嘅朋友，因為你根本忙到冇時間理會佢地。 在職嘅好處係你會有穩定嘅收入，暫時諗唔到第二個好處。斷捨離同時應用係個B身上，因為你一放完產假，諗住番左工之後，只要努力都餵到人奶嘅⋯⋯少妻們，你地太天真啦。好似我咁學歷低份工唔係照9晚5，食冇定時，想搵個時間泵奶都難。番到屋企爭取時間比個B埋下身諗住上番奶？難d囉，呀b鬆口唔肯飲⋯最後咪「斷」左條人奶路，又比d三姑六婆姨媽姑姐話：「你個b咁瘦，一定係你人奶唔夠營養囉。」咧一句，真係傷儘餵人奶嘅在職媽媽心「too hurt」 同時，你個b會慢慢咁「捨」棄你因爲佢已經做左一個奶粉b,認得個奶嘴同姐姐/婆婆/嫲嫲。最傷心個位未到，當然係每日臨「離」開屋企番工時⋯⋯上一分鐘就換屎片，下一分鐘就追巴士。 番到公司，唔多唔少都會有少少腦弱態⋯⋯間唔中犯下低級錯誤少不免，好似我咁有責任感嘅人。一發現自己又腦殘做錯野，都唔小心抑鬱左一陣。但我會望下隻smart watch，望下個仔張相，問自己：「有咩驅使你番工唔照顧個仔呀？係窮呀⋯⋯但一定要積極，一定要努力，因為做一個正面媽媽先會有個正面寶寶」 P.S.時光飛逝，今日係覆工2m24d,寶寶5m0d