講開餵人奶，一直抱著盡力而為嘅心態。由於陀孖胎，唔知道佢地會早幾多出黎同爸爸媽媽say hi，經驗分享話我知，孖胎會比較輕磅，所以決定買個比較優質嘅奶泵，希望俾最好嘅營養同抗體俾佢地，餵得幾多得幾多。餵人奶係點樣嘅？奶泵點用？孖胎可唔可以兩邊一齊餵？生完未必上奶，但又有可能多奶多到石頭乳.....雖然係youtube、雜誌同單張搵到好多資訊，但實際情況係點，對新手媽媽黎講係一個謎，唔親身經歷過真係唔會知。 每位媽媽嘅經歷唔同，以下純粹驗分享，有感而發而已。 餵人奶嘅好處好多，近年都為人認識。但原來每個媽媽體質不同，生產後嘅環境各異，都會影響奶量。由於我係開刀生，加上呀b比預期早左出世，頭一個星期仍未上奶。產後一星期，擠左一個鐘嘅成果﹕ 而呀b一出世醫院就用匙更餵佢地，所以佢地嘅吸吮能力差啲，係醫院提供嘅母乳工作坊都唔識吮，所以最後姑娘同意只泵奶唔埋身，一來可以方便唔同嘅照顧者知道佢地分別食左幾多，二來平均大細孖嘅需要。係醫院見住對面床每晚兩個鐘一次埋身餵，雖然睇到都辛苦，有時真係想親身經歷。但泵奶都唔係輕鬆事。偷到時間泵奶已經好好，仲要話定時定候，其實都唔容易。  要兼顧照顧呀b，好難安排定時泵奶，影響奶量。  唔夠休息，亦都影響奶量。  呀b唔埋身又少左刺激。  原來就生要做產前預備，使產後會容易上奶，自己已經miss左。  食任何上奶食物，每日湯水不斷都冇咩效果，都叫做有進步。就滿月，陪月見到你個樽，然後話: 咁少呀，OMG! 另外，打從陀bb起，已經有不同嘅聲音:  你點夠餵兩個呀  佢唔鐘意食你啲奶。  佢係唔食喎，你激呀。(然後每次將你辛辛苦苦泵嘅50ml倒左佢)  餵人奶唔飽。  你細細個都係食奶粉，都係咁大。 縱使經歷不同嘅不體諒，縱使破皮流血擠到手痛，縱使開刀傷口痛仍然堅持，別人會有深刻嘅體會。加上呀b每日大部分都係食奶粉，初期有便秘，健康院醫生極力推薦人奶，話有輕瀉作用。慢慢地，負面嘅聲音，會變成: 「媽媽泵奶泵得好辛苦，你要飲晒佢呀。」 兩星期，仲係見到樽底嘅熊仔樣。之後熊仔樣逐漸消失，只見熊仔鼻了﹗ 可幸嘅係，生孖b頭一個月屋企有唔同嘅照顧者，包括婆婆、公公、陪月、工人姐姐，親戚朋友上黎都會想抱下佢地，等媽媽可以偷到時間沖涼同泵奶。慢慢建立定時嘅泵奶時間，奶量每星期增100ml! Mama mlik由每餐嘅甜品，轉為主食，開始用奶袋。 見到過200ml，忍唔住影低 只要堅持，唔怕捱眼瞓，返左工後仍然有晨早一泵，最夜又一泵，雖然奶量冇增，亦都冇減。 每朝早嘅指定動作，分配大細孖嘅份量。每人每日2餐mama milk。 而家泵嘅夠兩兄弟食兩餐之餘，仲夠儲存，爆冰箱呀！ 泵奶不是求安數，原來全人奶對於有啲媽媽黎講真係好難。俾到幾多呀b，一匙更人奶也是愛。而家嘅心態係，倒瀉奶唔緊要，因為泵左出黎，身體會再製造。呀b飲唔晒唔緊要，唔好迫佢飲，留低用黎沖涼或者搽胎毒嘅粒粒都好效。 寫到呢度，有啲感慨。由於大細孖愈大，需要嘅關顧就愈多，決定逐漸少泵直至掛泵。藉此紀錄自己嘅奶路，希望準備做母乳媽媽同仍在努力中嘅你加油! 共勉之。     #新手媽媽歡迎俾意見 #交流嘅好處 fb.              哥哥細細 //小眼睛s看世界 ig.              cannyahn