喺5月30號發現bingo左！小baby悄悄的來臨了！ 當時應該係4週左右，到今日已經係8週，好好彩暫時未有嘔過，不過個肚好多時都有啲唔舒服或痛痛地，生理上已經出現各種變化，分泌物增多，胸部有脹痛感，生痔瘡同暗瘡，仲成日都覺得好肚餓，比較喜歡偏向濃味食物。 我諗都冇諗過自己會生痔瘡仲要係出現得咁早，好痛苦，又痕又痛，最近開始一去便便就好痛，會有血，已經keep住搽醫生開嘅痔瘡膏，好似冇乜效，睇黎都係要再去睇下醫生先得。 我記得陀芝麻時開頭係比較輕鬆，嘔左唔超過3次，口味冇太大變化，冇生痔瘡同暗瘡，今次明顯係有好大分別，我媽咪估今次可能係個細佬黎，唔知呢，我覺得單靠呢啲變化冇可能判斷得出性別，遲下驗下就知啦，仔女我都會咁鍾意。 一直聽某位朋友講法國醫院產檢好平，只係300幾，一樣有得照B超，就姑且去試下。第一次係walk in去登記，姑娘提醒因爲我係新症，冇booking係要等得耐啲，大約4個鐘，其實我已經有心理準備，因為我朋友同網上啲媽媽都係咁講，所以我喺呢段時間返一返公司做野先再返黎。果然係要4個鐘，我上午9點半到，差不多下午2點先到我見醫生。我係6月20號去法國醫院，當時已經有7週，仲照到閃閃tim☺️希望小baby你健健康康，順利出世。 比錢果一刻我有啲呆左，因為收左我900幾呀！但其實睇返張收費單係唔貴架，因為我做左個分泌物化驗，接近500蚊，醫生又開左痔瘡藥膏比我，加加埋埋就成千喇。普通出去一次私家產檢基本上都要700-1000，今次如果扣除化驗費都只係400幾，事實證明法國醫院產檢係真係好平好抵！不過醫生話如果我唔係要喺呢度生就唔可以regular喺度產檢。我都明嘅，醫生都要食飯都要賺錢，唯有自己出返去揾其他醫生產檢啦！