剛剛完成半單挑魔王芊嘅鹿兒島之旅，對收拾BB旅行行李有咗首次經驗！由於今次無人接力看顧要全程1on1，Wilma媽帶嘅行李確實有點太多⋯喺度同大家介紹一下今次我同呢個10個月大嘅寶貝4日3夜自由行行裝！ 食物 · 即食粥4日份 雖然芊羽係人奶B，埋身就得一個樽都唔使帶，但佢宜家已加咗兩固，所以一定要準備固體食物。我知有啲媽咪會帶小型電飯煲同砧板去煮嘢食俾BB，但冇同房冇隨行老公嘅我實在感覺無能為力，喺出發前俾BB食過確認佢係食嘅，就喺Watson Baby同一田掃咗一堆即食粥俾個囡頂一頂呢幾日。 推介品牌 1) 金姳熙3分鐘速食粥 食用方法：將兩小袋倒入碗中，注入120毫升嘅熱水（水温80度），然後攪拌成粥，等3分鐘就食得。（一袋份量只有80毫升，要兩包先足夠一餐喔） 2）寶寶百味即食粉 食用方法：可以用熱水座熱，或者注入適量熱水，攪拌就食得喇！ 售賣點及售價：Watson Baby / Mannings baby / 各大百貨嬰兒部 不同口味適合不同月齡，約HKD60 - HKD80 · 蒸餾水3L 因為怕BB飲唔習慣當地水，Wilma媽今次帶咗支4.5L，用黎整速食粥同BB飲用，不過用剩細半支，所以4日黎講3L應該就剛好！ · 保溫壺 · 餐具 · 小食餅餅 · 外出寶寶餐椅神器 呢度唔多介紹喇，外遊時唔一定每家飯店都有嬰兒坐椅，自備咗神器就唔使苦惱要抱著寶寶吃成餐飯喇。 神器簡介LINK https://bit.ly/2LtMHnB 沐浴 · 小瓶二合一沖涼液 · 吹氣嬰兒坐椅 其實今次Wilma媽帶咗個波波泳池，方便可以趁芊羽玩水時媽媽我就喺隔離沖涼。但實戰後發現處理沖完涼嘅水係一件非常吃力嘅事，下次都係帶吹氣坐椅放喺浴缸中直接洗好了。 售賣點及售價：各大百貨嬰兒部 HKD70 - HKD100 衣服類 （4日3夜夏天版，視乎地區炎熱程度） · 5套出街衫 · 5套睡衣 · 5件包屁底衫 · 1件外套 · 2件食飯用圍巾 · 4條口水肩 · 鞋、襪、帽隨媽咪喜好 日用品 · 尿片20-24塊 · 3包濕紙巾20片裝 · 屁屁膏 因為未必有地方隨時換片，如果BB PatPat紅咗一定要搽呢！ 雜項 · 睡袋 就算酒店有BB床，但始終生保地方，用返自己嘅嘢會令BB更有安全感 · 枕頭 · 被仔 · 揹帶 如果要周圍去，用揹帶真係最方便，因為唔係個個地方都適合帶BB車呢～ · 旅行BB車（optional） 有時揹BB太耐需要抖抖，一部可以hand carry上機嘅BB車真係幫倒手嘅。前提係你嘅BB肯坐，如果唔係會做成更大負擔呢 · 安全藥 身處外地，語言就算有強大google translate都未必通。有咩頭暈身慶喺當地睇醫生好難搞，大家可以喺出發前搵一搵香港嘅兒科醫生，拎基本退燒、肚瀉、鼻水咳藥帶去看門口。 如果你係人奶媽都要為自己準備呀，好似日本咁，常見嘅第三類藥係不適合哺乳媽媽服用㗎！ 最後當然就係旅遊證件啦( ͡° ͜ʖ ͡°) 申請Passport懶人包 https://bit.ly/2JoCjx1 以上checklist只供參考，大家都要按返自己BB實際需要呀！祝大家旅途愉快