工作關係平時連電視汁都無得撈飯，以往我好少煲劇，放假就會煲唔同綜藝，韓國、台灣、香港唔同電視台嘅都會睇。 直到年初放產假，多咗時間留喺屋企，喜歡嘅綜藝、電台節目一星期就煲晒，之後坐月唯有開住TBB有乜睇乜，竟然有晚（周末嚟嘅）喺J2發現呢套間中見到預告但未睇過嘅「雙面醫生」，仲以為佢係「妙手仁心」啲Friend。 原來每集都有一個關於「婦產科」嘅主題，拍得好認真好真實，起碼接生出嚟嘅BB真係初生size(哈哈哈哈哈哈哈哈哈哈)，亦有NICU情景(應該有醫院協助拍攝)。每集都有感人位，不過再溫暖嘅產科劇，除咗有BB「出生」，亦會有「死亡」，留意返喔！ 睇咗一集已經忍唔住愛上，原來已經拍咗兩季，誠意推介！ 「雙面醫生」改編自日本漫畫家鈴之木祐創作嘅婦產科題材漫畫，主角因為媽媽當年難產致死而立志成為婦產科醫生。故事環繞佢工作上遇到嘅唔同孕婦、BB同家庭。 我都好好奇TBB做乜無啦啦改人哋套劇叫「雙面醫生」，原來主角鴻鳥櫻表面係一個婦產科暖男醫生，另一個身分竟然係戴住假髮嘅神祕天才鋼琴家BABY！(基本上每集個尾都會出現彈下琴) 是次小分享完畢，有興趣可按 麵語錄食玩遊記 by Aminn 或 C家重地 其他分享 :) Aminn | Beauty．Food．Fun．Travel．Trendy｜  麵語錄食玩遊記 by Aminn (Lifestyle) www.facebook.com/m.for.aminn / www.instagram.com/starzaminn  C家重地 (Parenting) www.facebook.com/sy.lam.family 任何合作請接洽：aminn613@gmail.com