ANGRT BIRDS PLAY CENTER今年終於番嚟啦！記得上年只能開業一段很短的時間，今年暑假終於回歸D．PARK啦！       今年位置唔同咗，在L1(即地下層)1033號舖 (Pizza乞對面)。不過佢唔係自己一個舖位，而係同其他幾個單位配合D.PARK的「愛運動夏日訓練營」     行入會見到一個Reception，另外也有些小售賣攤位及平衡車場。     ANGRT BIRDS PLAY CENTER總共有5個遊戲，除了上年其中3個遊戲外，仲新增咗2個遊戲。(文末有介紹每個遊戲的收費)     其中一個就係呢個「ANGRT BIRDS FREE KICK 12碼神射手」唔知係咪為咗迎合世界盃呢？哈哈～     小朋友就走進這個像MMA的半開放式籠內^.^ 向屏幕射波去。     每局需要3枚代幣。     玩法有分單打或雙打，也有對戰式或過關模式。           你一定問係點樣可以雙打，原來一個喺裏面踢，另一個可以在外面睇住個小屏幕。       用手 touch screen 控制住守龍門的阿雄，擋住哥哥射嘅波。     阿雄嘅表情仲超爆笑，十足十世界盃救失12碼嘅龍門。     我哋連續玩咗幾舖，輪流同哥哥一人一舖。     芊芊起初話唔玩(超缺乏安全感的小姐)，但係入咗去試玩一次之後，就不斷嗌住話要再玩。         哥哥不斷左右掃控制住阿雄，唔要俾芊芊射入龍門。       另外一個新遊戲就係「憤怒 Baby Eggs」。     手持這丫叉狀的控制桿，一直向下壓不斷推撞機內的蛋蛋，撞入大肥豬的口裏面。     感覺就好似拋鑊鏟喺度炒飯咁，哈哈～       只需一枚代幣就可以玩一次，最適合同朋友一齊對戰鬥高分。     玩咗幾次之後都真係幾辛苦幾攰㗎...對手。     輪到等咗好耐嘅芊芊啦！本來仲怕唔知佢夠唔夠力，原來佢好大力...         個秘訣係唔好咁心急推D蛋，等佢積聚得多嘅時侯，先至一嘢撳落去炒佢上去個咀度。 (唔明點解要有隻阿雄喺度阻住...其實究竟係想佢食D蛋定唔食D蛋。)     其餘幾個遊戲都仍然保留，呢支射擊槍比起上年更有力更準繩。       兩個一齊鬥高分，但係芊芊不斷叫哥哥等陣，叫佢唔準射住...(乜可以咁架咩？)       好在哥哥都好錫芊芊，佢唔夠波仲會分自己的俾佢。       兩個玩到唔捨得轉下一個遊戲。     去到我最鍾意的「彈射大激鬥」(我叫佢真實版ANGRY BIRDS)     兩個一埋去已經知這道點玩架輕就熟。     仲記得芊芊一玩呢個就會呈現凶神惡煞嘅樣，哈哈～     哥哥超認真的樣子！       兩個會唔會太誇張呀，拉到個背脊都就嚟貼主個地下，我即刻要嗌番佢哋起身。     仲記得我哋上年夾公仔夾到佢哋...唔知放咗佢哋喺邊呢？ (阿雄：我係床底呀...救我呀！)     最後就入去玩充氣滑梯！放多少少電先離開。                 隨時嚟隨時玩，唔駛預約唔駛排隊 (如果少人嘅時侯^>^) 大家嚟到可以先到這售票處買飛同代幣。   而且有好多哥哥姐姐職員睇住小朋友玩好安全。     大家如果唔想逐次逐次買飛，可以考慮下呢個套票選擇。         Photo by Sony A7III FE 28mm F/2   想跟我去體驗其他活動，快D報名親子團，同埋留意專頁公佈詳情啦！ http://goo.gl/forms/CNZMEPoMIWkouK8o2   呀劍評分: 10分   呀劍評語: ANGRY BIRDS PLAY CENTER終於回歸啦！冇玩一年真係有少少掛住佢，因為真係好鍾意玩真實版，拎住隻公仔射出去好過癮，價錢同一般嘉年華攤位差唔多，可以隨時帶小朋友過嚟玩番下都幾開心㗎！   地址 D．PARK愉景新城L1 1033號舖 日期 2018年6月28日至2018年8月14日 營業時間 12nn- 8pm 費用 ANGRY BIRDS越野障礙滑梯(身高1m-1.3m) 星期一至四(不包括公眾假期)：$40/8分鐘 星期五、六、日及公眾假期：$50/8分鐘   ANGRY BIRDS彈射大激鬥 星期一至四(不包括公眾假期)：$30/回合 星期五、六、日及公眾假期：$40/回合   動感射擊場 星期一至四(不包括公眾假期)：$30/回合 星期五、六、日及公眾假期：$40/回合   代幣價格 $30/6枚代幣 憤怒Baby Eggs：1枚代幣 ANGRY BIRDS 12碼神射手：3枚代幣   電話 9164 5873 網址 http://www.kidgoland.com/   (以上資料更新至文章當日)       Facebook專頁: 呀劍萬帥 kimfamilytravel   Blog網誌 : www.kimfamilytravel.com