寶寶已經六個月了～ 回想生產過程…還是歷歷在目。 懷孕第249天，寶寶被迫要出世了。 其實寶寶很乖，整個孕期都没有令我有任何不適，反而辛苦了寶寶跟我搬屋、籌備婚禮、OT工作……連產假都未開始，足足早了一個月便要突然停工～ 因爲突然確診<嚴重妊娠毒血症>，為咗寶寶安全，醫生要進行緊急開刀。幸好，雖然寶寶未足37週，但都只係輕磅少少，沒有任何病痛。夠磅夠重便可以出院。 心終於定下來。 由入院檢查到寶寶出世都只係三天時間。所有事情都突然發生，都未來不及思考、反應、處理…不過事情應該由34週説起。 34w2d 私家檢查。自21w 照結構後都沒有到私家檢查，只是定時到健康院聽心跳同姑娘摸肚。這天照超聲波，醫生照到寶寶大脾同肚圍都只得約30w, 頭圍約32w。醫生告知因爲寶寶size較細，建議到醫院檢查有無特別情況，怕寶寶不能吸收營養～醫生便寫紙要我立刻到威院。心情有點緊張，怕因為沒有定時照超聲波而未能即時知道寶寶的健康情況～我們到威院8F產前病房後便駁機聽BB心跳，之後等醫生再作檢查～ 這次是懂事後第一次入醫院，真的很緊張～這晚姑娘定時聽bb心跳，探熱，根本不能熟睡。 34w3d 零晨12點幾，姑娘竟然說醫生有空，現在可以檢查～夜媽媽先得閒，醫生真係好忙。入到醫生房便照超聲波check bb size, check 胎水胎盤…到第二日因為係星期六，醫生要下午才巡房。醫生下午來到，就話BB size 係細少少，胎水岩岩達標，胎盤正常，臍帶亦正常運作。這天可以出院了～不過醫生要我定時回醫院覆診檢查，不用到健康院了。醫生話如BB繼續生長就可以到37週作催生。BB係肚入面越耐越好～  一心諗住仲有三個幾星期，應該無咩嘢嘅。 35w2d 這天按覆診期到醫院檢查，血壓竟然高至15x , 16x , 要立刻抽血，係5E日間病房訓床觀察血壓一天。醫生順便check 埋B鏈。當天 6點，醫生告知懷疑有妊娠毒血症致血壓高及肝酵素升，要留院繼續觀察。心情立即跌落谷底，眼淚不停流下來。這個症究竟係咩嚟？BB會唔會有事？很多很多問號～ 隨姑娘又一次到8F產前病房，這晚不停上網查妊娠毒血症是什麽～姑娘定時量血壓聽胎心探熱。 35w3d - 35w4d.  留院的兩天過得很漫長，不停量血壓、聽胎心、探熱，每次都會問我有沒有頭痛眼矇胃痛… 還由早到晚不停聽到睇到旁邊的孕婦大叫，準備被推到產房生產。心情實在緊張～唔知自己會唔會好似其他孕婦一樣叫到拆天痛到傻～醫生這兩天都只說要繼續觀察，不過有可能怕血壓突然飆升而留院個幾星期至37週便催生。隔離床有2個太太都有其他情況而留院～這兩天互相交流支持，希望寶寶都可以順利出世～ 35w5d 早上醫生報告沒有特别，只是要再抽血，下午2時多被叫入房，一入房就被告知：因爲妊娠毒血症已經突然嚴重了，肝酵素升至12x (正常係47 )令肝功能已經差了一半，血壓高，加上BB未調頭…要立刻開刀，怕BB不能再吸收任何營養。 都來不及反應，便要簽紙，收拾行李，換手術袍，姑娘在這時候量血壓～天呀！血壓爆升至19x 。試問剛被驚嚇完會唔高嗎？本來諗住同隔離太太交換電話，竟然就緊急開刀被推走了。下午3時被推到産房，第一時間便要插尿喉～一路等～ 等我的午餐消化，等手術室，等醫生，落防抽筋藥水，。等的期間，打了4個豆，1個失敗，抽血，每15分鐘量血壓～ 都未定神又問我可唔可以做教學用途～究竟仲有咩嘢要講要嚇我呢？由3時等到8時多。好彩可以有老公在旁陪伴。   下午8時半 被推入手術室，半身麻醉。 下午9時多 寶寶終於出世了～聽到了哭聲～望了一眼～BB便要送到兒科。因為寶寶係早產，加上輕磅，不能作肌膚之親，便要送去檢查了。 下午10多 推回產房觀察24小時，不能飲水食嘢，繼續打防抽筋藥水，每半小時量血壓。其中一邊手駁了止痛藥，姑娘話傷口痛就按一下制。 Day 2 零晨12時 終於可以返回產後病房 Day 3 下午6時   終於第一次抱抱寶寶～感動 經歷了六天，無數抽血、檢查～手被打豆打到又痛又瘀，Day 4 媽媽回家休息了，寶寶還在醫院儲肥到足磅先可以出院～   感謝朋友們的支持 感謝家人們的照顧 感謝老公四周頻撲，照顧，疼錫 感謝寶寶做乖乖豬 寶寶回家後才是新生活新挑戰的開始～ 只願寶寶健康快樂～