平靚正-寶血分娩套餐（上） （長文慎入）（內附下集連結） 昨日分享左我開刀的原因，今日同大家分享下寶血分娩有幾平靚正。 寶血醫院位於深水埗長沙灣的私家醫院，地鐵站行去都係3分鐘左右，不過知名度不及其他私家醫院，但唔代表差！正正因為咁，寶血醫院的分娩套餐真係平靚正取勝。 可能因為知明度較遜，寶血開刀分娩套餐只係四萬二千幾，大造平價吸引準媽媽；而寶血醫院環境相對寧靜及有足夠的醫護人員關心每位的需要。 蕃薯媽當日選擇寶血醫院有幾個原因： 1.平（應該係全港最平私院） 2.張智駐診（0️⃣零負評） 3.屋企附近（行路就到喇） 4.香港人免費升級至二人房（蕃薯媽第二晚開始係獨霸二人房） 前文提及蕃薯媽37週決定係寶血醫院開刀分娩，就要親臨寶血醫院交$6000按金，再電聯張智診所選擇開刀日子同時間，診所就會比封入院信✉️你分娩前夕入院喇。 分娩前夕大概晚上6點左右就上醫院三樓登記，再去會計部交多兩萬蚊按金，而姑娘就會做一些基本的檢查，包括度高、磅重、對文件、詢問會否加錢做額外新生兒檢查等等。 同時姑娘會了解準媽媽想餵母乳定配方奶，也會請準媽媽選擇水奶的牌子作準備，萬一媽媽未上奶的時候，醫院都可以按需要補給配方奶比bb。 由於蕃薯媽係開刀分娩，姑娘會替蕃薯媽修剪✂️體毛，等開刀位置低啲同靚啲。 修剪完就會去另一間房駁機聽胎心同檢查宮縮的情況，大概30分鐘，同時會有醫護人員替準媽媽抽血作配血????用途，配血係保障孕婦手術中途有任何緊急情況導致失血作救命之用。 一切檢查完成後，就會安排上病房自由活動，而手術前12小時要禁食，8小時前要禁飲。 位於深水埗的寶血周圍食肆林立，蕃薯媽手術前一晚叫蕃薯爸去附近綠林買芝麻糊再清一清胎毒，睇住踩過界渡過最後一晚二人行的日子。 大概晚上十時左右，姑娘們就會請親友離開，好讓準媽媽梳洗休息，而蕃薯媽就乖乖係醫院沖涼洗頭，因為知道生完之後有排冇得沖。 唔知係咪太緊張定張床太硬呢，蕃薯媽完全瞓唔到，眼光光望天光 手術前有姑娘黎病房核對資料，詢問會否加錢讓丈夫陪產，加錢在手術室拍照等等，當然係加啦，呢啲珍貴的回憶用錢都買唔到。 之後就換好手術衫，等護士黎病房駁尿喉，大家記得係冇麻醉的情況下駁尿喉，因為係病房駁唔洗加錢，如果係手術室麻醉後駁就要加錢（唔好問點解，我都唔知） 不過駁尿喉又唔係好痛，係有一下唔舒服，之後就冇乜感覺，當然係唔會有尿意啦。 再過多一陣，就有姑娘問有冇自備束腹帶手術後用，有就可以慳返唔洗加錢買，然後就安排過床做手術，戲肉黎喇。 蕃薯媽被推入手術室，唔緊張就假，話曬生仔真係一命換一命，不過緊張的氣氛好快被手術室姑娘們打破，姑娘們同麻醉師一見到我就不停同我傾計講笑，仲同我瘋狂影相拍片，我知道佢地好努力咁分散我注意力。 當一切準備就緒，麻醉師就會請我側身，係背脊落麻醉藥，落麻醉藥完全冇任何痛楚，過了一陣就感覺到麻麻痹痹，下身開始冇力，呢個時候蕃薯爸同張智醫生就入黎喇。 蕃薯爸入到黎坐係我右手邊，手術開始喇，其中一位姑娘好忙咁幫我同先生影相拍片，留住最珍貴一刻，我知道係要對鏡頭笑的，但啲麻醉藥開始溫溫鄧鄧，望住個鏡頭強顏歡笑咁。 好快大概5分鐘左右，張智醫生和麻醉師話宜家會推肚拎bb出黎（因為傷口開得較低，要推bb落去拎出黎）嘩！果下地動山搖，真係推到我以為會死，突然有一下想嘔同呼吸唔到的感覺，但未反應得切的時候就聽到蕃薯仔的喊聲喇，張智醫生將未抺身的蕃薯仔新鮮咁遞高比我望「恭喜曬，仔仔黎，bb喊得好大聲」 果一下新鮮伴隨住血水胎水彈到我塊面，第一下自然反應覺得「好污糟」，之後覺得好鬼正，因為真係見證到「第一眼」最真的蕃薯仔。 之後姑娘替蕃薯仔✂️剪臍帶同清潔（好感激手術室姑娘拍低左成個過程，第一下喊聲片段真係好好好珍貴），之後就抱過黎同新任爸媽合照喇。 下次再分享手術後的感覺同最關心出院埋單要幾錢 各位準媽媽對寶血分娩有任何問題，歡迎留言或inbox我啦 下集分享 https://www.facebook.com/1649867431715348/posts/1696870953681662/ 請like 我是周蕃薯 專頁 , 謝謝支持